Tónlistarkonan Hildur Guðnadóttir er nú á meðal 842 listamanna og framleiðenda frá 59 löndum sem hafa fengið boð um að taka sæti í bandarísku kvikmyndaakademíunni. Þetta staðfesti hún á samskiptamiðlinum Twitter og segir hún þar heiðurinn vera gríðarlegan.
Thank you so much to @TheAcademy! Such an honour! #theacademy #memberoftheacademy #musicbranch #composer pic.twitter.com/tsxivp5qB2
— Hildur Gudnadottir (@hildurness) July 7, 2019
Bandaríska kvikmyndaakademían er sú nefnd sem kýs um ár hvert hvaða einstaklingar munu hljóta Óskarsverðlaunin. Á meðal fleiri Íslendinga sem hafa hlotið boð í nefndina eru Atli Örvarsson tónskáld, Fríða Aradóttir förðunarfræðingur, Elísabet Ronaldsdóttir klippari, Heba Þórisdóttir og Jóhann Jóhannsson heitinn. Þau Jóhann og Hildur höfðu einmitt áður unnið náið saman áður en hann féll frá.
Hildur hefur vakið gríðarlega athygli að undanförnu og samdi meðal annars tónlistina fyrir HBO-þættina Chernobyl og spennumyndina Sicario: Day of the Soldado. Þar tók hún við keflinu af Jóhanni, sem samdi tónlistina fyrir forvera þeirrar myndar og hlaut Óskarstilnefningu fyrir verk sitt.
Sjá einnig: Hildur eyddi mörgum klukkutímum í kjarnorkuveri
Þess má einnig geta að hún semur tónlistina fyrir kvikmyndina Joker. Myndin er væntanleg í október á þessu ári og skartar þeim Joaquin Phoenix og Robert De Niro ásamt fleirum. Margir hverjir bíða eftir þeirri mynd með mikilli eftirvæntingu og tilheyrir hún splunkunýjum myndabálki frá hasarblaðaheimi DC Comics. Sagan tekur þarna nýjan vinkil forsögunnar að því hvernig Jókerinn varð að þeim alræmda glæpamanni sem flestir þekkja. Phoenix fer með titilhlutverkið og má sjá stikluna fyrir myndina hér að neðan.
