Það leikur enginn vafi á því að stórsöngvarinn Elvis Presley hafi brætt hjörtu margra. Arfleifð kóngsins í tónlistarheiminum er óumdeild og aðdáendahópur hans hefur um alla tíð verið dyggur.

Joel Williamson, rithöfundur og virtur sagnfræðingur, hefur nú kramið hjörtu ýmissa Elvis-aðdáenda en hann hermir að Presley hafi átt í ástarsamböndum við ógrynni af stúlkum undir lögaldri, allt frá því þegar söngvarinn var sjálfur 22 ára og undir lok. Fullyrðir rithöfundurinn að Elvis hafi verið „heltekinn af meydómi ungra stúlkna.“

Í bókinni sinni, Elvis Presley: A Southern Life, skrifar Williamson um líf söngvarans í tónleikaferðum og týnir saman sögur um ýmislegt sem gerðist á bak við lokaðar dyr. Segir Williamson að í þessum ferðalögum hafi Presley átt í nánum samböndum við þrjár fjórtán ára stúlkur og fleiri undir lögaldri. „Hann var mikið í því að fara með ungum stúlkum í koddaslag, kyssa þær og kitla,“ skrifar Williamson og tekur líka fram að Presley hafi átt í þekktu ástarsambandi við stúlku að nafni Dixie Locke. Þau stórsöngvarinn voru saman árin 1952 til 1955 og byrjuðu saman þegar hún var fimmtán ára gömul.

Williamson varpar einnig þeirri sprengju að Presley hafi færst í aukana í kvennamálunum þegar móðir hans, Gladys Presley, dó árið 1958. „Þar sem áður rann kynlífselfur var nú komið flóð,“ segir hann. „Frá þessu ári fram að dauða hans, varð hann alltaf að hafa konu eða stúlku með sér í rúminu.“

Á meðal þessara ungu stúlkna sem Elvis hreifst af var Priscilla Ann Wagner, sem þá var fjórtán ára. Hún giftist síðar söngvaranum og tók upp eftirnafn hans. Þau kynntust árið 1959 og hjónaband þeirra varði frá 1967 til 1973.

Þá rekur rithöfundurinn söguna af því þegar Priscilla flaug til Memphis í Tennessee til að flytja Elvis þær fréttir að nýr maður væri kominn í spilið hjá henni og að hún vildi skilnað. Í kjölfarið er söngvarinn sagður hafa orðið æfur og nauðgað Priscillu. „Þannig endaði ástarævintýri Elvis og Priscillu, með svívirðilegri nauðgun á makanum,“ skrifar Williamson.