Hvort sem fólk ætlar að spara saman fyrir einhverju stóru eða smáu, til dæmis fasteign eða fatnaði, þá lenda flestir í því að þurfa að setja sér ákveðin mörk til að geta keypt það sem stefnt er að og margir lenda einnig í að sparnaðurinn gengur ekki eins vel og til var ætlast. Það getur gengið illa að leggja fyrir mánaðarlega því það er alltaf eitthvað að koma upp sem þarf að nota peninga í. En með 50-20-30 reglunni er hægt að ná stjórn á þessu og ná góðum árangri að sögn.
Með því að fara eftir þessari reglu er tryggt að fólk haldi alltaf þeirri fjárhagsáætlun sem lagt er af stað með og nái að leggja það til hliðar sem stefnt er að. Þetta kemur fram á vefsíðunni Career Girl Daily. Þar er því haldið fram að með því að nota þessa einföldu reglu þá geti fólk náð stjórn á fjármálum sínum. Fram kemur að allir, óháð tekjum, geti notað þessa reglu með góðum árangri.
50 prósent af útborguðum launum eru notuð til að greiða fyrir ýmsar nauðsynjar, til dæmis húsaleigu, reikninga, mat og samgöngur. Undir þessar nauðsynjar flokkast raunar allt sem teljast óhjákvæmileg útgjöld sem ekki er hægt að sleppa.
20 prósent af laununum eru lögð til hliðar sem sparnaður. Ekki er verra að hafa sérstakan bankareikning fyrir þessa peninga. Þá er síðan hægt að nota þegar kemur að fasteignakaupum, bílakaupum eða til að greiða niður lán.
30 prósent af laununum eru síðan til ráðstöfunar í hvaðeina sem fólki langar í, til dæmis ný föt, Netflix, ferð á veitingahús eða nýtt sjónvarp.
Hannah Lutterbach, sem skrifar færsluna, segir að ef fólk fari eftir fyrstu tveimur liðunum í reglunni þá leyfi þriðja stigið því að skemmta sér aðeins með peningana og gera það sem það vill. Hún hvetur fólk til að fylgja reglunni stíft og ekki byrja að svindla á henni.
