Áhrifavaldurinn Sólrún Diego prýðir forsíðu nýjasta eintaks DV þar sem því er ljóstrað upp að hún hafi auglýst plaggat úr vefverslun í eigu unnusta síns, Frans Veigars Garðarssonar. Um var að ræða vefverslunina akart.is, sem lokað var eftir að fréttin fór í loftið.
Akart.is var skráð á félagið MSF ehf. sem er í eigu Frans Veigars Garðarssonar og skráð á heimilisfang í Mosfellsbæ þar sem Frans og Sólrún búa. Sólrún Diego er þar varamaður í stjórn og prókúruhafi. MSF ehf. er einnig eigandi í SD Media slf. þar sem Frans og Sólrún eru prókúruhafar.
Frans sagði í samtali við DV að þetta mál kæmi Sólrúnu ekki við, en Sólrún auglýsti vefverslunina án þess að taka fram að um auglýsingu væri að ræða og án þess að geta þess að unnusti hennar ræki hana. Sólrún hefur ekki tjáð sig um málið en birtir tilfinningaríkar tilvitnanir í sögu sinni á Instagram.
„Aldrei biðjast afsökunar á líðan þinni,“ stendur á einni mynd og á annarri stendur:
„Stundum þarf maður bara frí. Á fallegum stað. Aleinn. Til að finna út úr öllu.“