Í Fréttablaðinu í dag birtist keypt umfjöllun um Heilsu og útlit í Kópavogi, en eigandi stofunnar er Sandra Lárusdóttir. Sandra er eiginkona tónlistarmannsins Eyjólfs Kristjánssonar, sem væri svo sem ekki í frásögur færandi nema fyrir þær sakir að Eyjólfur vinnur á stofunni við að hvítta tennur fólks.

„Maðurinn minn, Eyjólfur Kristjánsson, fór út að læra tannhvíttun og við höfum verið að bjóða upp á slíkt með góðum árangri,“ segir Sandra í greininni. Með fylgir mynd af Eyfa að hvítta tennurnar á söngkonunni Svölu Björgvinsdóttur.

Í kynningunni kemur einnig fram að Heilsa og útlit bjóði upp á sogæðameðferðir, sem Aron Einar Gunnarsson, landsliðsfyrirliði í fótbolta, hafi meðal annars nýtt sér fyrir síðasta heimsmeistaramót.

„Hann var ekki í góðu ástandi, meiddur á hné og ökkla og ekki viss um að geta spilað. Hann kom til okkar í sjö skipti þessa viku sem hann var heima. Ég veit ekki betur en að læknirinn hafi síðan gefið honum grænt ljós á að spila. Hann var mjög ánægður með okkur og við hann enda færði hann okkur stærðarinnar Búddastyttu og blómvönd.“