Unnur Lilja Aradóttir gaf nýverið gaf út sína fyrstu bók, Einfaldlega Emma, sem Unnur segir vera sögu um venjulegt fólk í óvenjulegum aðstæðum. Bókin er gefin út af bókaútgáfunni Hringaná en birting á auglýsingum fyrir bókina hefur ekki gengið áhyggjulaust.
Rithöfundurinn greindi frá þessu á Facebook-síðu sinni. „Hringaná – bókaútgáfa á í erfiðleikum með að kaupa auglýsingar á Facebook fyrir Einfaldlega Emmu vegna ‘nektar’ á bókarkápunni jafnvel þó myndin sé ritskoðuð,“ segir Unnur en á kápunni má sjá teiknaða mynd af karli og konu án fata. „Hvað segir fólk, er myndin á kápunni virkilega of gróf fyrir auglýsingar??? Ég verð að segja að ég er svolítið hissa.“ Mynd af kápunni má sjá hér fyrir neðan.
Unnur er menntaður sjúkraliði og hefur starfað við umönnun síðastliðin tuttugu ár en DV tók nýverið viðtal við hana. Þar sagðist hún hafa fengið hugmyndina að bókinni fékk Unnur þegar samstarfskona hennar á Landspítalanum sagði henni frá kjaftasögu sem hún kom óvart sjálf af stað um sig. Þá var ekki aftur snúið. „Þessi kjaftasaga er svolítið óvenjulega venjuleg en samstarfskona mín kom til mín eina vaktina og spurði mig hvort ég hefði heyrt einhverjar skrítnar sögur um hana. Hún sagði mér þá frá því að tveimur dögum fyrr hefði hún verið á vakt og í einhverjum fíflagangi komið af stað orðrómi um að hún ætti í ástarsambandi við mun yngri mann sem vann með okkur, en mamma hans var líka góð vinkona hennar og vaktstjóri á deildinni. Þá kviknaði eitthvað í hausnum á mér og ég fór að velta fyrir mér þessari sögu um ástarsamband með þessum aldursmun,“ sagði Unnur en viðtalið í heild sinni má lesa hér.