„Mér finnst ekki notalegt að vakna við að fína hljóðkerfið í stofunni minni stilli sig inn á einhvern nágranna sem er að horfa á KLÁM. Þetta er að gerast á hverju kvöldi á sama tíma,“ skrifar reykvísk kona í Facebook-færslu sem hún gaf DV leyfi til að birta. Eitthvað veldur því að á hverju kvöldi fer af stað hljóðrás úr klámmynd í hljóðkerfi konunnar. 

„Ég tók hljóðkerfið úr sambandi þegar þetta gerðist fyrst, en mér finnst mjög ósanngjarnt að ég þurfi að kippa því úr sambandi á hverju kvöldi. Er eitthvað sem ég get gert? Í von um svör sem fyrst. Mér finnst ekki gaman að vakna við stunur og skelli þegar ég er sofandi.“

Líkur eru á því að nágranninn tengi sig óvart inn á Bluetooth-tengingu konunnar og því ætti ráðið til hennar að vera líklega það að fara í stillingar og afvirkja Bluetooth-tengingu.

Einnig er mögulegt að nágranninn sé að nota sama wifi, þ.e. þráðlaust net, sem er þó ekki eðlilegt og ætti að vera hægt að fyrirbyggja. Þekkt eru dæmi um svona hljóðrásarrugling í þráðlausum heyrnartólum.