Fjölmiðlamaðurinn og tónlistarmógúllinn Simon Cowell ljómaði á rauða dreglinum í gærkvöldi þegar að undanúrslit hæfileikaþáttarins America’s Got Talent fóru fram, en Simon er einmitt einn af dómurum í þáttunum.

Simon er líkt og breyttur maður, en hann hefur grennst mikið undanfarna mánuði. Hann ákvað að breyta um lífsstíl í lok árs 2017 eftir að leið yfir hann og hann sendur á sjúkrahús vegna of lágs blóðþrýstings.

Simon leitaði í kjölfarið til þekkts læknis sem gerði alls kyns rannsóknir á honum. Læknirinn sagði Simon að hætta að borða rautt kjöt, mjólkurvörur, sykur, brauð og glúten. Hann mætti hins vegar leyfa sér stöku áfengan drykk. Simon hefur farið eftir ráðum læknisins í einu og öllu og nýtur nú lífsins með sinni heittelskuðu, Lauren Silverman, og fimm ára syni þeirra, Eric.