Tara Margrét Vilhjálmsdóttir, formaður Samtaka um líkamsvirðingu, segir það skjóta skökku við að ekki sé hægt að fá svokallaðar Empwr peysur á vegum UN Women í stærðinni XL. Allur ágóði af sölu á peysunum rennur til neyðarathvarfs UN Women fyrir Róhingjakonur á flótta í Bangladess.
Tara segir á Facebook-síðu að það felist þversögn í því að peysur sem boði valdeflingu fáist ekki í yfirstærð. „Frekar mikil þversögn í skilaboðum peysunnar og stærðunum sem hún býðst í (xs-l). Ég er hætt að vera meðvirk með fatamerkjum sem útiloka stóran hóp fólks, óháð hugsuninni á bak við fatnaðinn. Gerið bara betur!,“ segir Tara.
Hún bendir svo á í athugasemd að hægt sé að fá peysurnar í XS, þó færri noti þá stærð. „Þrátt fyrir að xl er miklu meira keypt stærð en nokkurn tímann xs. Þetta meikar ekki einu sinni sens út frá viðskiptafræðilegu sjónarhorni,“ segir Tara.
