Þorvaldur Bjarni Þorvaldsson, tónlistarstjóri Menningarfélags Akureyrar, er nú staddur í Asíu þar sem hann leitar andagiftar til að setja sig í spor afa Gissa, aðal söguhetjunnar í nýja söngleiknum Gallsteinar afa Gissa.

Þorvaldur hefur áður samið tónlistina fyrir suma af vinsælustu barnasöngleikjum síðari tíma, eins og Ávaxtakörfuna, Gulleyjuna, Benedikt Búálf og Gosa.

Gallsteinar afa Gissa, sem einnig er eftir Kristínu Helgu Gunnarsdóttur og Karl Ágúst Úlfsson og í leikstjórn Ágústu Skúladóttur, er sjöundi söngleikurinn hans og sá þriðji sem þeir Karl Ágúst vinna saman að. Báðir komu þeir að Kabarett sem slegið hefur rækilega í gegn hjá LA en auk þess unnu þeir saman að Gosa, auk Selmu Björnsdóttur, og Gulleyjunni með Sigurði Sigurjónssyni.

„Mér er sko ekkert að leiðast við að setja tóna við frábæra texta vinar míns frekar en fyrri daginn,“ segir Þorvaldur sem ætlar að njóta jólanna í Tælandi ásamt fjölskyldu sinni meðfram vinnunni. Það verður því spennandi að heyra hvort sólin eigi eftir að setja sinn svip á tónlistina í nýjasta verkinu en söngleikurinn, Gallsteinar afa Gissa, verður frumsýndur þann 23. febrúar í Samkomuhúsinu á Akureyri.