Leikkonan Hera Hilmarsdóttir hefur verið ráðin í eitt aðalhlutverkið í fyrirhugaðri kvikmynd og þáttaröð sem byggð er á Sjálfstæðu fólki nóbelsskáldsins Halldórs Laxness. Fréttavefurinn ScreenDaily greinir frá þessu.
RÚV og RVK Studios, framleiðslufyrirtæki Baltasars Kormáks, standa á bak við verkefnin en gert er ráð fyrir því að þetta verði ein umfangsmesta framleiðsla íslenskrar kvikmynda- og sjónvarpsþáttagerðar.
Sjálfstætt fólk gerist í upphafi tuttugustu aldar og segir frá því þegar bóndinn Bjartur lætur gamlan draum rætast. Hann kaupir lítið heiðarbýli sem hann nefnir Sumarhús. Þar með er Bjartur loks orðinn sjálfstæður maður eftir sautján ár í vinnumennsku. Hann berst við að halda sjálfstæði sínu allt til enda, ekki síst gagnvart fyrrum yfirboðurum sínum á Útirauðsmýri, hreppstjóranum og Rauðsmýrarmaddömunni.
Baltasar mun leikstýra þáttunum og fer Ingvar E. Sigurðsson með hlutverk Bjarts í Sumarhúsum. Reiknað er með að tökur fari fram undir lok næsta árs eða í byrjun þess þarnæsta.