Orðið á götunni samkvæmt öruggum heimildum Eyjunnar, er að Gunnar Bragi Sveinsson sé rúinn öllu trausti innan Miðflokksins. Staða Sigmundar Davíðs, formanns, er einnig sögð tvísýn.
Margir úr grasrótinni eru sagðir hugsi, þar sem þeir styðja hvorki Sigmund Davíð né Gunnar Braga og enn síður Bergþór Ólason, eftir að fréttirnar um leyniupptökurnar birtust í gær.
Vilborg G. Hansen, sem er varamaður í bankaráði Seðlabanka Íslands, hefur bæði sagt sig bæði úr Miðflokknum og bankaráði:
„…þar sem mér er ómögulegt að styðja lengur þann flokk sem ég sit í umboði fyrir eftir fréttir gærdagsins í DV og Stundinni.“
Staða Gunnars Braga þótti viðkvæm áður, en framganga hans í leyniupptökunum virðist hafa verið kornið sem fyllti mælinn.
Fjölmargir hafa kallað eftir afsögn Gunnars Braga og Bergþórs innan Miðflokksins og margir undrast nálgun Sigmundar Davíðs með yfirlýsingu sinni í gær á Facebook, að rengja fréttaflutninginn og gera upptökurnar sjálfar að aðalatriðinu, í stað þess að sýna auðmýkt og biðjast afsökunar á sinni framgöngu.
Samkvæmt heimildum Eyjunnar eru mjög margir flokksmenn ósáttir, málið sé alvarlegt og ekki til fyrirmyndar né eftirbreytni, ekki síst vegna stefnu flokksins í jafnréttismálum.
Aðeins tvær úrsagnir eru staðfestar úr Miðflokknum eftir að fréttir bárust í gærkvöldi, samkvæmt skrifstofu Miðflokksins. Er stuðningsyfirlýsingum sagt rigna inn í kjölfar fréttaflutningsins.
