Orðið á götunni er að herbragð Morgunblaðsins gegn sósíalistum hafi heppnast framar vonum. Fréttaskýring Agnesar Bragadóttur um mikil átök á skrifstofu Eflingar er hluti hennar, en hún er nú mest lesna frétt vikunnar á vef MBL. Náði þetta að hrista allverulega upp í hópnum sem styður Sólveigu Önnu Jónsdóttur, formann Eflingar, sem og hópnum sem ætlar sér að hækka laun þeirra lægst launuðu allverulega í komandi kjaraviðræðum.

Hópurinn sem ætlar í orrustu við atvinnurekendur og ríkið til að krefjast mikilla kjarabóta hefur fram til þessa fengið að vera tiltölulega í friði fyrir utan fullyrðingar um óraunsæi og háðsglósur um kommúnisma. Með einni frétt tókst að grafa allverulega undan áliti á Eflingu og Sólveigu Önnu.

Orðið á götunni er að það skipti litlu hvort ásakanirnar séu sannar eða ekki og munu yfirlýsingar frá Eflingu sem og Facebookfærslur Gunnars Smára Egilssonar breyta litlu. Skaðinn er skeður og nú geta eigendur fyrirtækja, stjórnendur, íbúar Garðabæjar og eigendur bíla árgerð 2018, alltaf getað sagt: „Formaður Eflingar, hún er bara ófriðarhex sem gerir allt vitlaust.“

Á móti kemur að stuðningsmenn Sólveigar Önnu og Gunnars Smára munu seint fyrirgefa Mogganum þetta.

Það hefur lengi blasað við að kjaraviðræður vetrarins yrðu harðar og má því leiða að líkum að þetta mál verði aðeins eitt af mörgum þegar upp er staðið. Vekur þetta einnig upp spurninguna hvort það verði ekki reynt af hörku að grafa upp einhvern skít á skrifstofu Samtaka atvinnulífsins.