Forsætisnefnd Alþingis hefur ákveðið að Sjálfstæðisflokkurinn skuli víkja úr þingflokksherbergi sínu á jarðhæð Alþingishússins. Nýtt þingflokksherbergi Sjálfstæðismanna verður ekki í Alþingishúsinu sjálfu heldur í Smiðju, nýrri byggingu Alþings við Vonarstræti.

Þingflokkur Samfylkingarinnar, sem er fjölmennasti þingflokkurinn eftir kosningarnar 30. nóvember sl., fer í hið svonefnda bláa herbergi, stærsta þingflokksherbergið í Alþingishúsinu, sem Sjálfstæðisflokkurinn hefur haft til umráða í 84 ár, frá 1941, þremur árum áður en lýðveldið var stofnað.

Í græna herberginu, sem Framsókn hefur löngum haft, verður Viðreisn og Flokkur fólksins verður í gula herberginu, sem á árum áður var þingflokksherbergi Alþýðuflokksins.

Með þessari breytingu eru allir þrír ríkisstjórnarflokkarnir með þingflokksherbergi sín á jarðhæð Alþingishússins en stjórnarandstaðan í viðbyggingum. Hagræði þykir af því að ríkisstjórnarflokkar hafi fundaraðstöðu í sama húsi, og þá helst í Alþingishúsinu sjálfu.

Sjálfstæðismenn hafa ólmir viljað halda í stærsta þingflokksherbergið og borið því við að þeir eigi eins konar hefðarrétt og miklar tilfinningar og saga tengist herberginu. Hildur Sverrisdóttir, formaður þingflokks Sjálfstæðismanna, hefur hótað því að þingmenn flokksins fari í setuverkfall í bláa herberginu verði flokknum gert að rýma það. Ekki er vitað á þessari stundu hvort Sjálfstæðismenn láta verða af þeirri hótun.