Mannréttindadómstóll Evrópu komst í dag að þeirri niðurstöðu að íslenska ríkið hefði brotið á réttinum til frjálsra kosninga. Um er að ræða hið svokallaða talningamál í Norðvesturkjördæmi í Alþingiskosningunum 2021 en frambjóðendurnir Guðmundur Gunnarsson, Viðreisn, og Magnús D. Norðdahl, Píratar, kærðu málið til dómstólsins fyrir tæpum tveimur árum.

Kvörtun þeirra til dómstólsins laut að annars vegar framkvæmd talningar í kjördæminu og annars vegar að því að þeir hafi ekki haft skilvirka leið til að koma kvörtunum sínum áleiðis.

Eins og frægt varð þá fór allt á hliðina í kjölfar kosninganna eftir að í ljós kom misræmi í flokkun atkvæða sem greidd höfðu verið C-lista Viðreisnar í kjördæminu. Var í kjölfarið ráðist í endurtalningu í kjördæminu en pottur var brotinn varðandi þá framkvæmd og leiddi rannsókn í ljós að annmarkar hefðu verið á geymslu atkvæðanna milli talninga.

Alls bárust Alþingi sautján kærur vegna framkvæmda kosninganna og rannsakaði sérstök kjörbréfanefnd málið. Að endingu var það Alþingi, samkvæmt stjórnarskrá, sem úrskurðaði um lögmæti kosninganna. Var það meðal annars atriðið sem Mannréttindadómstóllinn taldi ekki ganga upp – að Alþingismenn ráði örlögum sínum sjálfir.

Sigurður Örn Hilmarsson, lögmaður, tvímenninganna segir í samtali við Vísi að ljóst sé að breyta þarf stjórnarskrá Íslands í kjölfar dómsins.

Þá var íslenska ríkinu gert að greiða þeim tvímenningunum um 13 þúsund evrur í bætur sem samsvarar um tveimur milljónum íslenskra króna.