Þetta sagði Guðrún Hafsteinsdóttir, dómsmálaráðherra, í samtali við Morgunblaðið þegar hún var spurð um mikla útgjaldaaukningu í útlendingamálum.
Blaðið segir að á síðasta ári hafi verið áætlað að 15 milljarða útgjöld yrðu vegna útlendingamála, aðallega vegna hælisleitenda, en útreikningar dómsmálaráðuneytisins sýni að kostnaðurinn var 33% hærri.
Í ár er reiknað með að útgjöldin verði 16 milljarðar en ekki liggur fyrir hvort sú áætlun standist. Sagðist Guðrún óttast að áætlunin haldi ekki og að það veki hjá henni ugg að áætlað sé að fjöldi hælisleitenda verði sá sami og á síðasta ári en þá voru þeir 4.157.
„Það liggur alveg í hlutarins eðli að aukningin hingað er alveg gríðarleg og er miklu, miklu meiri en íslenskt samfélag ræður við. Það skrifast fyrst og síðast á það að við erum hér með opnara regluverk heldur en löndin í kringum okkur. Það er bara ákjósanlegra að koma hingað í leit að vernd heldur en til nágrannalandanna,“ sagði Guðrún.
Hún segir að lausnin á þessu ástandi felist meðal annars í að laga regluverk okkar að því sem sé á hinum Norðurlöndunum.