Samkvæmt svari Þórdísar Kolbrúnar Reykfjörð Gylfadóttur, fjármála- og efnahagsráðherra, nema hæstu greiddu viðbótarlaun til ríkisstarfsmanns á einu ári um 9,7 m.kr. og voru þau greidd á Landspítalanum árið 2022.
Um er að ræða fyrirspurn frá þingmanni Flokks fólksins, Eyjólfi Ármannssyni, um greiðslu viðbótarlauna til starfsmanna ríkisins í ljósi frétta um bónusgreiðslur hjá embætti Skattsins. Segir í svari að heimild forstöðumanna ríkisstofnana til greiðslu viðbótarlauna eigi sér lagastoð í lögum um réttindi og skyldur starfsmanna ríkisins. Þó beri að fara eftir reglum ráðherra um framkvæmdina. Núverandi reglur eru frá árinu 2022. Slíkar greiðslur eru bókaðar með ólíkum hætti eftir því hvort þær byggjast á lögum eða stofnanasamningi.
Á grundvelli stofnanasamninga hafa mest verið greiddir 2,5 milljarðar á ári, og þá til um 5.200 einstaklinga. Þessar tölur séu óvenjulegar þar sem þær megi rekja til mönnunarvanda og álags á Landspítalanum. Hæstu viðbótargreiðslu á grundvelli stofnanasamnings fékk einstaklingur á Landspítala sem á einu ári fékk 9.743.550 kr. í viðbótargreiðslur á árinu 2022. Á meðfylgjandi töflu úr svari ráðherra má sjá hvernig árið 2022 sker sig úr, en á sama tíma hvernig viðbótargreiðslur á grundvelli lagaheimildar hafa aukist.
Ráðherra segir að fjárveitingar vegna viðbótargreiðslna árið 2022 hafi verið afgreiddar í fjárlögum sem og í fjáraukalögum. Kemur þó fram í svari að ekki sé um neitt hámark að ræða á greiðslur sem þessar. Í eldri lögum var talað um 30 þúsund krónur, en það hámark var síðar afnumið með nýjum reglum og kjarasamningum. Greiðslur til starfsfólks Skattsins sem til umfjöllunar hafa verið voru þó takmarkaðar af 2 prósentum launasummu þess starfsfólks em tilheyrði stéttarféögum BHM og fékk fjórðungur þeirra greiðslu í hvert og eitt skipti. Slíkar greiðslur voru framkvæmdar tvisvar á ári og námu hjá Skattinum 500 þúsund, en allir fengu sömu fjárhæð greidda. Fjórðungur starfsmanna Skattsins hjá BHM gat fengið viðbótarlaun á hverju sex mánaða matstímabili. Breyting var svo gerð á stofnanasamningi 9. febrúar og eftir breytingu hafa tvær nýjar starfsaldurshækkanir leyst viðbótarlaun af.
