María Rut Kristinsdóttir kynningarstjóri UN Women hefur sagt starfinu lausu, og mun hún taka aftur við starfi aðstoðarmanns Þorgerðar Katrínar Gunnarsdóttur, formanns Viðreisnar. María Rut fór til starfa hjá UN Women í mars í fyrra og var þar áður aðstoðarmaður Þorgerðar í fjögur ár.

María Rut segir í færslu á Facebook að kominn sé tími til að „stíga aftur inn á skemmtilegasta völlinn, með skemmtilegustu konunni, þingflokknum og starfsliðinu. “

Segist hún sannfærð um að „að erindi Viðreisnar hafi sjaldan verið mikilvægara en akkúrat núna. Með fjórtándu vaxtahækkuninni sem bítur okkur öll, óreiðunni í ríkisfjármálunum, biðlistum í allri grunnþjónustu, vaxandi pólaríseringu og sundrungu. Þar þurfum við Viðreisn, sterka Viðreisn.“

Segir María Rut að stundum sé nauðsynlegt að stíga út til að koma öflugri til baka og þakkar hún UN Women fyrir allt. María Rut hefur undanfarið verið í fæðingarorlofi með Ingileif Friðriksdóttur, eiginkonu sinni og segist hún spennt að taka aftur við gamla starfinu:

„Ég er spennt og glöð að taka aftur við aðstoðarmannahlutverkinu. Það var svo sem ákveðið snemma á árinu að ég myndi koma til baka, en ég var svo lánsöm að fá að eiga fjóra góða mánuði með Hrafndísi okkar og Ingileif í fæðingarorlofi. Enda ekkert í heiminum dýrmætara en nákvæmlega það.“

Hvetur María Rut þá sem pæla í pólitík til að taka þátt og láta sig samfélagið varða.