Stjórn Félags héraðsskjalavarða á Íslandi lýsir yfir miklum áhyggjum af hugmyndum borgarstjóra um að loka Borgarskjalasafni Reykjavík. Segir félagið að safnið sé lykilstofnun þegar kemur að varðveislu opinberra skjala höfuðborgarinnar. Í ályktun frá félaginu er jafnframt lýst yfir efasemdum um að lokun safnsins myndi leiða til eiginlegs sparnaðar:

„Stjórn Félags héraðsskjalavarða á Íslandi lýsir yfir áhyggjum sínum vegna þeirrar tillögu borgarstjóra að loka Borgarskjalasafni Reykjavíkur.

 Borgarskjalasafnið á sér langa og merka sögu og er lykilstofnun þegar kemur að varðveislu opinberra skjala Reykjavíkurborgar, stofnana borgarinnar og fyrirtækja. Þó lög heimili að slík skjöl séu varðveitt á Þjóðskjalasafni Íslands eru þau betur komin á sérhæfðu safni sem varðveitir, miðlar og veitir aðgang að þeim í samræmi við þarfir, væntingar og metnað borgarinnar til þjónustu við íbúa og skilvirkni stjórnsýslunnar.

 Þá eru ótalin þau fjölmörgu einkaskjalasöfn sem varðveitt eru í Borgarskjalasafni, en varsla þeirra til framtíðar, sem og áframhaldandi söfnun slíkra skjala, er sett í algjört uppnám með þessari tillögu.

 Stjórn Félags héraðsskjalavarða á Íslandi telur einnig ástæðu til að efast um að tillaga borgarstjóra leiði af sér neina verulega fjárhagslega hagræðingu þar sem Reykjavíkurborg, stofnanir borgarinnar og fyrirtæki munu eftir sem áður bera ábyrgð á og greiða kostnað af frágangi og varðveislu skjala sinna í Þjóðskjalasafni Íslands. Skorað er á Reykjavíkurborg að opinbera þær fjárhagslegu forsendur sem tillagan byggir á svo að fram megi fara opin og hreinskiptin umræða um þær með aðkomu sérfræðinga á sviði skjalavörslu.“