Fréttastofa áhugamanna um pólitík, eða FÁUP, hefur vakið athygli á síðustu árum en þar eru á ferð ungir drengir sem eru bæði vel að sér í íslenskri pólitík og flugbeittir spyrlar.

FÁUP er ekki síst athyglisverð þar sem fréttamennirnir eru aðeins 13 ára gamlir en fréttastofan var stofnuð árið 2018 og stofnmeðlimir þá aðeins tíu ára gamlir.

Nú fyrir kosningarnar tóku þeir Atli Hjálmar Björnsson, Magnús Sigurður Jónasson og Matthías Atlason viðtöl við formenn allra flokka sem gefa kost á sér. Þeir gerðu alls fimm YouTube-þætti fyrir alþingiskosningarnar þar sem tveir flokkar voru teknir fyrir í hverjum þætti og voru piltarnir ófeimnir við að spyrja formennina um viðhorf til nýrrar stjórnarskrár, hvernig hægt sé að laða fleira starfsfólk á undirmannaðan Landspítala, innflytjendamál og áherslur í uppbyggingu öflugs menningarlífs hér á landi.

Auk þeirra þriggja fyrrnefndu sem tóku viðtölin eru meðlimir fréttastofunnar þeir Arnmundur Sighvatsson, Snorri Sindrason og Úlfur Marinósson, Úlfur sem sér um grínsketsa á milli viðtala, Arnmundur sem er leikstjóri og allir taka þeir þátt í handritsgerðinni.

Drengirnir hafa gert sig gildandi í stjórnmálaumfjöllun fyrir síðustu kosningar og láta sig allt varða, hvort sem það eru alþingiskosningar, sveitarstjórnakosningar, nú eða forsetakosningar bæði á Íslandi og í Bandaríkjunum.

DV ræddi við liðsmenn FÁUP í ársbyrjun. Þeir voru þá fimm en eru nú sex, þannig að það bætist í þennan góða hóp.

Ungir fréttamenn á ferð og flugi: „Hann talaði við okkur eins og við værum átta ára og vissum ekkert um kosningarnar“

Hér að neðan má horfa á þættina fimm sem þeir gerðu fyrir alþingiskosningar. DV mælir með.