Til greina kemur að sölutryggja hlutafjárútboð Icelandair og er það til skoðunar hjá félaginu að sögn Boga Nils Bogasonar, forstjóra Icelandair Group. Með sölutryggingu er átt við að samningur er gerður á milli fjármálafyrirtækis og útgefanda verðbréfa þar sem fjármálafyrirtækið skuldbindur sig til að kaupa þau hlutabréf sem seljast ekki í almennu útboði.

Fréttablaðið skýrir frá þessu. Blaðið segist hafa heimildir fyrir að horft sé til að Íslandsbanki og Landsbanki muni sölutryggja útboðið.

Icelandair gerir ráð fyrir að selja nýja hluti fyrir 20 milljarða króna að nafnverði í útboðinu. Gengið verður ein króna á hlut. Ef umframeftirspurn verður mun stjórn félagsins hafa heimild til að auka hlutafé um allt að þrjá milljarða til viðbótar. Hámarksstærð útboðsins yrði því 23 milljarðar króna.

Haft er eftir Boga að hlutafjárútboðið muni ekki fela í sér neinar skuldbreytingar þar sem kröfum er breytt í hlutafé.

„Ef við berum okkur saman við flugfélög eins og Norwegian sem fór þá leið, þá var fyrst og fremst verið að breyta vanskilum eða óveðtryggðum skuldum í hlutafé. Við erum hvorki með vanskil né óveðtryggð skuldabréf, þannig að staða okkar gagnvart lánardrottnum var allt önnur en hjá Norwegian.“

Er haft eftir honum.

Hann sagði að áætlanir og hagræðingaraðgerðir geri Icelandair vel í stakk búið til að keppa á flugmarkaðinum. Sveigjanlegri kjarasamningar og aukið vinnuframlag áhafna, ásamt öðrum aðgerðum, lækki kostnað á hvern sætiskílómetra um tíu prósent til 2024 samkvæmt áætlunum félagsins. Launakostnaður verður 28 prósent af tekjum samanborið við 30 prósent 2018.

„Við gerum ráð fyrir ákveðnum verðlagshækkunum eins og verið hefur síðustu ár. Ef sú forsenda gengur eftir munu önnur félög einnig glíma við verðlagshækkanir. Með þeim aðgerðum sem við förum í verður félagið mjög samkeppnishæft á þeim markaði sem það starfar á.“