Lúðvík Bergvinsson héraðsdómslögmaður og fyrrverandi þingflokksformaður Samfylkingarinnar krefst þriggja milljóna króna í miskabætur af ritstjóra Viðskiptablaðsins, Trausta Hafliðasonar, vegna meiðyrða í nafnlausum dálki blaðsins er nefnist Óðinn. Hefur hann stefnt Trausta sem og útgáfufélaginu. Fréttablaðið greinir frá.
Telur Lúðvík að ætlunin hafi verið að sverta mannorð sitt og krefst þess að ósönn, óviðurkvæmileg, tilhæfulaus og smekklaus ummæli í nafnlausa pistlinum frá því um miðjan apríl, séu dæmd dauð og ómerk.
Skrif Óðins komu í kjölfar frétta af störfum Lúðvíks sem óháðs kunnáttumanns fyrir Samkeppniseftirlitið, hvar Lúðvík hafði þegar þegið 41 milljón króna frá Festi fyrir að fylgjast með skilyrðum í sátt Samkeppniseftirlitsins þegar N1 keypti Festi og fylgja þeim eftir, en störfum Lúðvíks lýkur árið 2023. Er það áttfalt hærri kostnaður en kostnaður Haga af slíkum kunnáttumanni þegar Olís var keypt, samkvæmt Fréttablaðinu.
Lúðvík segir skrif Óðins gefa í skyn að vinskapur við forstjóra samkeppniseftirlitsins hafi ráðið för þegar hann var skipaður, sem sé fráleitt. Þá mótmælir hann skrifum Óðins um að kostnaðurinn við samrunann séu efni í „safaríkan Kveiks þátt“.
Og að lokum telur Lúðvík að skrif Óðins séu gróf ásökun í hans garð um að hann hafi gerst sekur um fjársvik og skjalafals, sem sé algerlega tilhæfulaust, en í pistlinum sagði:
„…öll skynsemis- og réttlætisrök virðast hníga að því að Festi kæri kunnáttumanninn fyrir tilhæfulausa reikninga“.
