Björt Ólafsdóttir skrifar:
Þjórsárver eru eitt af þeim svæðum Íslands sem er ómetanlegt hvað varðar náttúrufar og lífríki. Þau eru til að mynda víðáttumesta gróðurvin miðhálendisins, í yfir 600 metra hæð yfir sjávarmáli og þar á þriðjungur allra heiðagæsa heimsins varpstöðvar sínar. Hluti Þjórsárvera var friðlýstur árið 1981 og er á alþjóðlegri skrá Ramsarsamningsins sem dýrmætt votlendissvæði, sérstaklega vegna auðugs fuglalífs.
Verndargildi Þjórsárvera og aðliggjandi svæða er óumdeilanlegt og því löngu tímabært að stækka friðlandið. Það hefur reyndar legið lengi fyrir og árið 2013 var unnin tillaga að verulegri stækkun þess. Í henni var að auki lagt til að friðlandið næði einnig yfir Hofsjökul. Því miður lauk þáverandi umhverfisráðherra ekki við áformin um stækkun friðlandsins og hefur málið legið í dvala síðan.
Mér finnst óásættanlegt að málið hafi ekki verið leitt að fullu til lykta á sínum tíma. Ég hef því tekið friðlýsingaráformin frá 2013 upp að nýju með það fyrir augum að ljúka þeim. Ég hef kynnt þau áform fyrir hlutaðeigandi á góðum fundi með fulltrúum þeirra sveitarfélaga sem eiga skipulagslega lögsögu yfir Þjórsárverasvæðinu og Hofsjökli. Drög að friðlýsingarskilmálum og afmörkun svæðisins hafa nú þegar verið send sveitarfélögunum til kynningar og umsagna, auk þess sem þau liggja á heimasíðu umhverfis- og auðlindaráðuneytisins til almennrar umsagnar.
Fyrirliggjandi tillaga að stækkuðu friðlandi Þjórsárvera liggur að friðlandinu Guðlaugstungum til norðurs og til vesturs að fyrirhuguðu friðlandi í Kerlingarfjöllum sem unnið er að þessi misserin. Þannig mun verða hægt að tengja svæðin saman í eina heild hvað varðar m.a. vernd, landvörslu og umsýslu.
Aukin vernd miðhálendisins er einmitt eitt af megin áherslumálum mínum sem umhverfis- og auðlindaráðherra og er nefnt sérstaklega í stefnuyfirlýsingu ríkisstjórnarinnar. Að mínu mati fellur stækkun á friðlandi Þjórsárvera sem og fyrirhugað friðland í Kerlingarfjöllum vel að þeirri vinnu og lít ég á þau áform sem mikilvæg skref í átt að aukinni vernd þess stórbrotna svæðis sem miðhálendið er.
Birtist fyrst í Suðra. Smelltu hér til að lesa blaðið.
