Efnahagslegt umfang laxveiði í ánum þremur í Ísafjarðardjúpi, sem eru á áhrifasvæði fyrirhugaðs laxeldis er aðeins einn þúsundasti af því sem laxeldið gefur af sér. Tekjur af stangveiði í Langadalsá voru á síðasta ári um 10,5 milljónir króna. Ekki liggja fyrir upplýsingar um tekjur af veiðinni í Hvannadalsá og Laugardalsá en sé miðað við Langadalsá og tekið tillit til veiðinnar í hverri á má ætla að heildartekjurnar í ánum þremur hafi verið um 24 milljónir króna á síðasta ári.
Þetta er ekki fjarri því sem ætla má út frá skýrslu Hagfræðistofnunar Háskóla Íslands frá 2004 um efnahagsleg áhrif af lax- og silungsveiði á Íslandi og greinargerðar Sveins Agnarssonar, hagfræðings til Fræðaþings landsbúnaðarins 2005, sem er byggð á skýrslu Hagfræðistofnunarinnar. Samkvæmt þeim gögnum voru beinar tekjur 2 – 2,4 milljarðar króna á landinu öllu. Hlutur ánna í Ísafjarðardjúpi er um 1,4% af því og að teknu tilliti til þess að verðlag hefur tvöfaldast frá því verðlagi sem skýrslurnar voru reiknaðar á fæst að beinar tekjur geti verið um 30 – 36 milljónir króna á ári af laxveiði í ánum þremur.
Efnahagsleg áhrif af 30.000 tonna laxeldi í Ísafjarðardjúpi eru miklu meiri. Kristján Davíðsson, framkvæmdastjóri Landssambands fiskeldisstöðva telur að fiskeldið muni skapa 600 störf og að útflutningsverðmætin verði um 25 milljarðar króna. Beringer Finance, norrænn fjárfestingarbanki, gaf nýlega út ýtarlega skýrslu um íslenskt laxeldi. Þar eru svipaðar kennitölur um fjölda starfa og útflutningsverðmæti sem fylgja tilgreindu magni.
130 milljarðar króna á landsvísu
Í skýrslu Beringer Finance, sem meðal annars er greint frá í Morgunblaðinu 6. júlí 2017, er því spáð að árið 2020 verði framleiðslan orðin 66 þúsund tonn og innan 5 – 8 ára geti framleiðslan verið farin að nálgast 200 þúsund tonn. Á þessu ári er áætlað að framleiðslan verði 11000 tonn af laxi og ríflega 18000 tonn af eldisfiski samtals. Árlegar tekjur af fiskeldinu verði um 130 milljarðar króna þegar fram í sækir. Gangi það eftir yrði laxeldið um 5% af landsframleiðslunni. Til samanburðar lagði sjávarútvegurinn til 8% af landsframleiðslunni árið 2015. Fjöldi starfa sem væru í laxeldi yrði samkvæmt skýrslunni um 6000. Til samanburðar þá eru um 9000 störf í sjávarútveginum í heild. Í skýrslunni er byggt á upplýsingum frá íslensku fiskeldisfyrirtækjunum, þeim leyfum til framleiðslu sem þau þegar hafa og umsóknir fyrirtækjanna um aukningu. Í skýrslunni er því spáð að verð á eldisfiski muni haldast hátt á næstu þremur árum.
Birtist fyrst í Vestfjörðum. Smelltu hér til að lesa blaðið.
