Krafa reglugerðar um að strikamerki verði lóðrétt en ekki lárétt er órökstudd viðskiptahindrun og getur leitt til hærra vöruverðs. Þetta segir Félag atvinnurekanda í erindi sem sent hefur verið á umhverfis- og auðlindaráðuneytið. Að öllu óbreyttu tekur reglugerðin gildi 1. júní næstkomandi en er í umsagnarferli innan EES til 23. maí.

Áfengisframleiðendur í Evrópu hafa mótmælt reglugerðinni harðlega, segja þeir þörfina á lóðréttum strikamerkjum óútskýrða. Því er Ólafur Stephensen framkvæmdastjóri FA sammála:

Að okkar mati er afar gagnrýnivert að ráðuneytið hefur ekki rökstutt með neinum hætti þörfina á þessari nýju kröfu. Krafa sem þessi er hvergi annars staðar í gildi á EES-svæðinu. Hún er gríðarlega íþyngjandi fyrir íslensk fyrirtæki, skapar viðskiptahindrun og mun að öllum líkindum hafa í för með sér hærra vöruverð fyrir neytendur,

segir Ólafur og bætir við:

Þetta er enn eitt dæmið um að stjórnsýslan setur reglur út í loftið án þess að velta fyrir sér eitt augnablik áhrifunum á atvinnulífið.

Segir félagið að sambærilega kröfu um lóðrétt strikamerki ekki að finna í Evróputilskipun eða Evrópureglugerð og ef reglugerðin verði að veruleiki þá gangi Ísland lengra en nágrannalöndin. Nú séu strikamerki á drykkjarvöruumbúðum eru ýmist lóðrétt eða lárétt, t.d. séu flestar léttvínsflöskur og flöskur með sterku áfengi með láréttu strikamerki en það er mismunandi með bjórtegundir og gosflöskur. Á þeim tegundum sem eru innfluttar sér erlendi framleiðandinn um að setja strikamerkið á vöruna.

Telur FA að vegna smæðar markaðarins sé nánast útilokað að erlendir framleiðendur myndu fást til að sérmerkja þær vörur sem flytja ætti til Íslands svo krafa reglugerðarinnar yrði uppfyllt. Þá yrðu innflytjendur að endurmerkja allar flöskur með ærnum tilkostnaði og vinnu. Ljóst er að sá kostnaður myndi að endingu lenda á neytendum með hærra vöruverði.