Ársreikningur Borgarbyggðar fyrir árið 2016 var afgreiddur í sveitarstjórn við seinni umræðu þann 11. maí sl.
Samkvæmt reglum um reikningsskil sveitarfélaga skiptist ársreikningur í tvo hluta. Annars vegar er A-hluti, sem er almennur rekstur sveitarsjóðs sem að mestu leyti er fjármagnaður með skatttekjum. Hins vegar er B-hluti sem eru stofnanir í eigu sveitarfélagsins og eru reknar sem fjárhagslega sjálfstæðar einingar. Undir B-hluta Borgarbyggðar fellur sorphirða, félagslegar íbúðir, Reiðhöllin Vindási, fjallskilasjóðir, fasteignir Hjálmakletts og fjármögnun Hjúkrunarheimilisins að Brákarhlíð.
Niðurstöður og lykiltölur ársreikningsins bera með sér að rekstur sveitarfélagsins gekk vel á árinu 2016. Afkoma sveitarsjóðs er mun betri en fjárhagsáætlun gerði ráð fyrir. Þá er efnahagur sveitarfélagsins traustur. Verulegur viðsnúningur hefur náðst í rekstri sveitarfélagsins á síðustu árum.
Afkoma umfram væntingar
Gunnlaugur A. Júlíusson sveitarstjóri Borgarbyggðar segir að afkoman hafi verið döpur í mörg ár eftir efnahagshrunið haustið 2008. Þá varð atvinnulífið í Borgarbyggð fyrir ýmsum áföllum. „Til dæmis misstu um 200 manns vinnu bara hjá einu fyrirtæki sem er Loftorka. Nú er hins vegar meira líf í atvinnulífinu þar sem ferðaþjónustan hefur meðal annars lifnað við. Vindar blása nú hagstæðar en áður og fólki fjölgar í sveitarfélaginu. Svo var farið í ýmsar hagræðingaaðgerðir eftir síðustu sveitarstjórnarkosningar. Þær eru að skila sér nú. Samin var sérstök aðgerðaáætlun þar sem meðal annars var ákveðið að losa og selja eignir. Það er reyndar ekki alveg búið að klára fyrirhugaða eignasölu. Nú er búið að selja alls fyrir vel á fjórða hundrað milljóna króna. Þetta bætir lausafjárstöðu sveitarfélagsins.“
Sterkari fjárhagur
Betri tíð endurspeglast nú sterkt í reikningum Borgarbyggðar. „Útkoman var ágæt árið 2015 og styrktist enn frekar 2016,“ segir Gunnlaugur.
Rekstrarniðurstaða í samstæðu A+B hluta er þannig 427,1 m.kr. að teknu tilliti til reiknaðra liða. Það er 196,1 m.kr. betri afkoma en gert var ráð fyrir í fjárhagsáætlun. Rekstrartekjur A-hluta sveitarsjóðs eru 3.582,6 m.kr. Þar af voru skatttekjur 1.992 m.kr. og framlög frá Jöfnunarsjóði sveitarfélaga 1.018 m.kr. Heildartekjur í samstæðu A+B hluta voru 3.935 m.kr. sem eru 347 m.kr. hærri fjárhæð en áætlað var í fjárhagsáætlun. „Það helst í hendur aukin hagræðing, meira líf í atvinnugeiranum auk þess sem við fáum auknar tekjur úr Jöfnunarsjóði sveitarfélaga og íbúum fjölgar.“
Laun og launatengd gjöld námu alls 2.045 m.kr. hjá A+B hluta samstæðu en 1.898 m.kr. hjá A-hluta. Stöðugildi Borgarbyggðar í árslok voru 257 og hafði þeim fjölgað um 1,8 á árinu. Kaup á vörum og þjónustu voru 1.243 m.kr. hjá A+B hluta og 1.139 m.kr. hjá A-hluta. Fjármagnsgjöld voru 37,9 m.kr. hjá A+hluta.
Skuldir lækka
Veltufé frá rekstri var 506,3 m.kr. hjá A+B hluta (364 m.kr. 2015) og 544 m.kr. hjá A-hluta (266 m.kr. 2015). Það gerir 14,1% af heildartekjum hjá A-hluta sem er hækkun frá 8,5% á fyrra ári. Í fyrra seldi Borgarbyggð eignir fyrir 237 m.kr.
Samhliða þessu lækka skuldir. Í tilkynningu frá sveitarfélaginu kemur fram að langtímaskuldir A-hluta „séu einungis 2,5 sinnum hærri en veltufé frá rekstri miðað við að þær voru tæplega sexfalt veltufé á árinu 2015.“ Veltufjárhlutfall (hlutfall lausaskulda og lausafjármuna) er 1,58 miðað við 0,83 á sl. ári. Skuldahlutfall A+B hluta er 119% og fyrir A-hluta er það 77%. Í sveitarstjórnarlögum er miðað við að skuldahlutfall fari ekki yfir 150%.
Afborganir langtímalána voru 273 m.kr á árinu 2017 og lækkuðu langtímaskuldir A+B hluta um 253 m.kr. milli ára. Skuldaviðmið var 78% fyrir A+B hluta í árslok og 56% fyrir A-hluta. Heildarskuldir A+B hluta eru 4.671 m.kr. og heildarskuldir A-hluta 2.767 m.kr. Lífeyrisskuldbindingar eru 788 m.kr. og hækkuðu þær um 77 m.kr. á árinu. Eiginfjárhlutfall er A+B hluta er 35% en A-hluta 48%. Handbært fé í árslok var alls 641 m.kr. hjá A+B hluta. „Borgarbyggð er nú á góðri vegferð. Skýrt merki um það er að nú er farið að úthluta lóðum, bæði hér í Borgarnesi og á Hvanneyri. Fólk er í framkvæmdahug,“ segir Gunnlaugur A. Júlíusson.
Birtist í landshlutafréttablaðinu Vesturlandi. Það má lesa með því að smella hér fyrir neðan:
