„Í tilefni af fjölmiðlaumræðu um 5 daga legudeild Klíníkurinnar vill undirritaður árétta að hvorki Velferðarráðuneytið né Embætti landlæknis hafa neinar athugasemdir við starfsemina sem heldur áfram ótrufluð þrátt fyrir ýmis konar upphrópanir síðustu daga sem flestar byggjast á misskilningi eða rangtúlkunum.“

Svona hefst fréttatilkynning frá Hjálmari Þorsteinssyni bæklunarskurðlækni og framkvæmdastjóra Klíníkurinnar í Ármúla. Segir hann að erindið sem liggur á borði Velferðarráðherra og Sjúkratrygginga Íslands er snýr að Klíníkinni sé tilboð stofnunarinnar um að veita hinu opinbera aðstoð við að stytta biðlista t.d. eftir liðskiptaaðgerðum og kvensjúkdómaaðgerðum. Mikil þörf sé á starfseminni sem sýni sig í tölum um komu sjúklinga, 1.500 sjúklingar hafi komið á Klíníkina í fyrra og hafi sjúklingarnir verið konur í 85 prósent tilvika:

Eins og staðan er nú hafa íslenskir sjúklingar á löngum biðlistum rétt á að fara til útlanda í aðgerðir sem hægt er að framkvæma á Klíníkinni og það álitaefni sem liggur fyrir hjá Velferðarráðuneytinu er m.a. hvort ekki sé ráð að gefa sjúklingum sem eiga rétt á aðgerðum erlendis að fá þær á Klíníkinni og þannig mætti stytta biðlista verulega og auka lífsgæði sjúklinganna. Svar við þessum erindum hefur ekki borist til undirritaðs og mun þar af leiðandi ekki tjá sig um mögulega niðurstöðu fyrr en svar liggur fyrir hendi.

Segir Hjálmar forsíðufrétt Fréttablaðsins í dag gott dæmi um beinlínis rangan fréttaflutning. Það liggi ljóst fyrir eftir ítarlega úttekt Embættis landlæknis frá 17. janúar á þessu ári að Klíníkin uppfylli kröfur til að reka hvort heldur sem er sérhæfða sjúkrahúsþjónustu eða starfsstofu heilbrigðisstarfsmanna með 5 daga legudeild, því sé ekkert til fyrirstöðu að Klíníkin leggi inn sjúklinga í kjölfar aðgerðar:

Ekkert erindi liggur fyrir frá Klíníkinni um að ráðherra veiti leyfi til stofnunarinnar sem ,,sérhæft sjúkrahús” og ekki stendur til að óska eftir því. Núverandi rekstur og sú starfsemi sem mun á næstunni bætast við krefst þess ekki að slíkt leyfi verði veitt og því er sú umræða sem verið hefur í fjölmiðlum síðustu daga afskaplega villandi.