Sigmundur Davíð Gunnlaugsson, fyrrverandi forsætisráðherra og fyrrum formaður Framsóknarflokksins og núverandi þingmaður Framsóknarflokksins er ekki ánægður með kaup vogunarsjóða á 30% hlut í Arion Banka. Hann sakar ríkisstjórn Sjálfstæðisflokks, Viðreisnar og Bjartrar framtíðar um slælegan undirbúning og raunar algjört stefnuleysi hvað framtíð fjármálakerfisins varði.

Sigmundur segir að Goldman Sachs, sem eignast hefur 2,6% hlut í Arion Banka, sé erkitáknmynd alþjóðafjármálakerfisins. Auk þess keypti fjárfestingarsjóðurinn Och-Ziff 6,6% hlut í bankanum og rifjar Sigmundur upp mál þar sem sjóðurinn þurfti að borga 213 milljón dollara sekt til bandaríska ríkisins. Það þurfti sjóðurinn að gera eftir að vera uppvís að hafa greitt mútur og brotið gegn bandarískum lögum um bann við mútugreiðslum. Þetta var í fyrsta skipti sem bandarískur vogunarsjóður þurfti að sæta refsingar fyrir brot á þessum lögum.

Auk Goldman Sachs og Och-Ziff hefur Attestor Capital eignast 9,99% í bankanum og Taconic Capital Advisors sama magn hluta.

Það eru þó ekki allir sammála Sigmundi og forstjóri Arion Banka, Höskuldur H. Ólafsson, fagnaði þeim og sagði þetta vera mikilvægan lið í áframhaldandi viðleitni bankans til að innleysa eignasafn sitt og greiða fjármuni til hluthafa Arion banka.

Ég hlakka til að vinna með þessum félögum þegar við höldum áfram að selja hlut okkar í Arion banka, líklega í gegnum almennt hlutafjárútboð þar sem við vonumst til að geta boðið einstaklingum og félögum innanlands færi á að fjárfesta í bankanum.

Forsætisráðherrann fyrrverandi er ekki jafn hrifinn og skrifaði á Facebook síðu sinni í gær að einhverjum hafi þótt það merki um ofsóknarbrjálæði þegar því var haldið fram að vogunarsjóðir og tengdir aðilar myndu beita öllum tiltækum ráðum til að hámarka hagsmuni sína hér á landi. Sigmundur bendir á að þegar vogunarsjóðir yfirtóku Lýsingu hafi það ekki verið metið fordæmisgefandi af Fjármálaeftirlitinu. Sigmundur spyr einfaldlega ,,hvað nú“.