Málþing verður haldið í hátíðarsal Háskóla Íslands milli fjögur og sex á morgun vegna útgáfu bókarinnar The Icelandic Financial Crisis: A Study into the World´s Smallest Currency Area and its Recovery from Total Banking Collapse eftir þá Ásgeir Jónsson hagfræðing og Hersir Sigurgeirsson stærðfræðing. Bókin er að sögn Ásgeirs eins konar framhald bókar hans frá 2009, Why Iceland?: How One of the World’s Smallest Countries Became the Meltdown’s Biggest Casualty.

Bókin hefst þá afdrifaríku helgi árið 2008 sem allt var farið að stefna í óefni í hagkerfinu hér á landi og segir frá aðgerðum íslenskra stjórnvalda í hruninu og einkum í kjölfar þess, hvernig bönkunum var skipt upp, fjármagnshöftin og deilur yfirvalda við kröfuhafa í slitabúum föllnu bankanna.

Fókus þessarar bókar er endurreisnin

segir Ásgeir.

Fyrstu tveir kaflarnir segja frá hruninu sjálfu og þeirri krísustjórnun sem fór í gang í þessum mesta umbrotatíma íslensks efnahagslífs og síðan er farið í gegnum aðgerðir yfirvalda sem fylgdu í kjölfarið.

Why Iceland? Var skrifuð í miðju hruninu og er að sögn Ásgeirs eitt af grundvallarritum fyrir erlenda fræðimenn sem rannsaka hrunið og hún hafi ,,staðist nokkuð vel tímans tönn“. Hrunið er er þó mun hugstæðara Íslendingum en útlendingum að sögn Ásgeirs. Í samtali við Eyjuna sagði hann að það sem gerst hefði hér á landi í kjölfar hrunsins væri mun merkilegri atburðarrás í augum útlendinga en hrunið sjálft.

Þeir Ásgeir og Hersir hafa lengi unnið að bókinni en hún er gefin út af hinum virta útgefanda Palgrave McMillian og er hún hluti af bókaseríu Studies in Banking and Financial Instutions.

Á málþinginu sem haldið er á morgun í tilefni útgáfu bókarinnar halda höfundarnir tveir erindi og síðan verða pallborðsumræður. Þar taka þátt Kristrún Heimisdóttir, rannsóknarfélagi við Columbia Law School í New York, Sigurður Hannesson, framkvæmdastjóri Eignarstýringar Kviku, Jónas Fr. Jónsson, héraðsdómslögmaður og fyrrum forstjóri FME og Jóhannes Karl Sveinsson hæstaréttarlögmaður og lagalegur ráðgjafi stjórnvalda í viðbrögðum við falli bankanna og ýmsum eftirmálum þess. Það má því búast við fjörugum umræðum undir styrkri stjórn Ólafs Þ. Harðarsonar prófessors við stjórnmálafræðideild Háskóla Íslands.