Nú þegar rennur út samningur Reykjavíkur við fyrirtækið AFA JCDecaux sem rekur strætóskýli í borginni er kannski tími til að hugsa hlutina upp á nýtt. Þessi strætóskýli voru afar stöðluð – og það verður að segja eins og er að þau voru ekki sérlega skjólgóð. Hentuðu semsagt ekki vel í hinni votu og vindasömu borg.

Þetta má auðvitað nálgast með ýmsum hætti, en svo mætti líka setja upp skýli þar sem sköpunarkraftur borgaranna kemur betur fram.

Sovétríkin voru þekkt fyrir annað en að ýta undir sköpun og einstaklingsframtak, en kanadíski ljósmyndarinn Christopher Herwig komst að því að hugmyndaflug Sovétborgara hafði náð að brjótast fram í hönnun strætóskýla. Hann fór vítt og breitt um Sovétríkin og myndaði strætóskýli – og verður að segjast eins og er að sum eru alveg einstök.

Sýnishorn af myndunum má finna á vef sjónvarpsstöðvarinnar CNN. Það er óhætt að mæla með þessu fyrir áhugafólk um hönnun, arkitektúr og kommúnistaminjar.