Vilhjálmur Birgisson formaður Verkalýðsfélags Akraness er segir það hafa tekið 21 ár að hækka lægsta taxta verkafólks um 197 þúsund á mánuði en það hafi tekið 200 launahæstu forstjórarana einungis árið í fyrra að fá 200 þúsund króna hækkun á sínum mánaðarlaunum.

Í pistli Vilhjálms á Pressunni gagnrýnir hann harðlega bónusgreiðslur stjórnenda LBI sem greint var frá í morgun:

Enn og aftur er dregið í lottói hjá elítunni en núna voru fjórir stjórnendur LBI með allar lottótölurnar réttar og fá hver í sinn hlut um 90 milljónir! Rétt er að geta þess að þeir sáu sjálfir um að draga lottótölurnar.

Um daginn var dregið í lottói hjá Framtakssjóði Íslands sem lífeyrissjóðirnir eiga og þar hlaut framkvæmdastjórinn 20 milljóna vinning fyrir það eitt að hafa náð að starfa í þrjú ár fyrir sjóðinn,

segir Vilhjálmur. Af því tilefni leit hann í tekjublöð ársins í ár og ársins í fyrra og fann stjórnendur Samtaka atvinnulífsins, SA, sem vilja koma á vinnumarkaðsmódeli í anda Salek samkomulagsins sem Vilhjálmur er telur ekki þjóna hagsmunum launafólks:

Launin hjá þeim sem ég skoðaði voru frá tæpum 2 milljónum upp í tæpar 12 milljónir á mánuði en það var forstjóri Bláa lónsins sem var með um 12 milljónir. Að hugsa sér að þetta sé síðan sama fólkið og talar um mikilvægi þess að stöðva höfrungahlaupið, koma á stöðugleika og beisla launahækkanir er svo mikið viðbjóðsleg hræsni og siðblinda að það nær ekki nokkurri átt.

Vilhjálmur segir það hafa tekið 21 ár að hækka lægsta taxta verkafólks um 197 þúsund á mánuði en það hafi tekið 200 launahæstu forstjórarana einungis árið í fyrra að fá 200 þúsund króna hækkun á sínum mánaðarlaunum. Í dag sé lægsti taxtinn 257 þúsund á mánuði en meðallaun 200 launahæstu forstjóranna eru rétt tæpar 3 milljónir á mánuði:

Hugsið ykkur svo líka að svo tala fulltrúar Samtaka atvinnulífsins um að búið sé að hækka lægstu launin sérstaklega á liðnum árum og áratugum! Hvernig má það vera í ljósi þess að forstjórar fá sömu krónutöluhækkun á einu ári og verkafólk hefur þurft að brejast fyrir í 21 ár!

Það er morgunljóst að almenningur er búinn að fá upp í kok af þessari græðgisvæðingu hjá snobbelítunni sem telur sig hafið yfir annað launafólk í þessu landi.