Ásmundur Friðriksson þingmaður Sjálfstæðisflokksins hefur oftar enn einu sinni vakið hörð viðbrögð vegna skoðana sinna um hvernig honum finnst að eigi að taka á móti hælisleitendum. Í hvert sinn sem hann opnar munninn um þessi mál virðist allt fara á annan endann. Heldur Ásmundur fram að alls staðar nema á Íslandi megi ræða þennan málaflokk á skynsemi.
Ásmundur var í viðtali á Útvarpi Sögu í gær þar sem rætt var um vopnaburð lögreglu og svo hælisleitenda. Fór Ásmundur um víðan völl. Þar kom fram að hann sér eftir norsku hríðskotabyssunum sem voru sendar til baka eftir fjölmiðlaumfjöllun DV. Þá telur hann að styttist í að hryðjuverk verði framið hér á landi og ber hann kostnaðinn við hælisleitendur saman við hin umdeildu Dýrafjarðargöng.
„Við erum að velja hérna inn kvóta-flóttamenn sem virðist hafa tekist ágætlega. Hingað hafa komið fjölskyldur og sest að víða og gengur það allt vel,“ segir Ásmundur og bætir við að hælisleitendur reyni að villa á sér heimildum, henda vegabréfum og brenna fingur sína svo ekki sé hægt að taka fingraför og bera kennsl á þá.
„Í flestum tilvikum er þetta fólk að mæta á flugvöllinn með vegabréf og flugmiða, því það kæmist ekki um borð í þessar vélar öðruvísi. Það er síðan frá síðustu innritun, frá því að það fer um borð, þá nota þeir tækifærið og henda vegabréfunum í næstu ruslafötu, mér er sagt að þeir troði þeim inn í innréttingar flugvélanna, fari með það á salernið og hendi þeim. Og þegar þeir koma til landsins eru þeir ekki með vegabréf,“
segir þingmaðurinn og segir að fleiri hundruð hælisleitendur fylli gistihús og hótel á kostnað ríkisins.
Pétur Gunnlaugsson þáttastjórnandi á Útvarpi Sögu spurði þá hvort ekki þyrfti að kanna betur bakgrunn hópsins.
„Ég er enn á þeirri skoðun að við þurfum að fara mjög varlega. Við þurfum að vita hverjir sækja okkur heim. Ég vil vita hver er að koma heim til mín. Koma til Íslands,“ svaraði Ásmundur.
Sér eftir byssunum
DV greindi frá því fyrir þremur árum að íslenska lögreglan hefði fengið 150 hríðskotabyssur frá Noregi. Í frétt DV sagði: „Samkvæmt þessum öruggu heimildum DV er búið að kaupa 200 MP5-hríðskotabyssur.“
Eftir fréttaflutning af málinu voru byssurnar sendar aftur til Noregs. Ásmundur sér eftir þessum byssum en um þær segir hann:
„Þingið kom í veg fyrir það að lögregla gæti fengið ný vopn á sínum tíma sem voru gamlar norskar byssur. Þæru voru hingað komnar og áttu að efla lögregluliðið. Því var öllu snúið til baka, byssum skilað og ég velti fyrir mér hvar stöndum við núna ef ógæfa dynja yfir sem ég vona að verði aldrei. Það er eins og með þjófa á nóttu. Þeir munu ekki hringja á undan sér.“
Þá ræddi Ásmundur um hættu á hryðjuverkum hér á landi. Um það sagði hann:
„Mér finnst það sorglegt þó innst inni sé maður það mikið barn í sér að trúa því að hér gerist ekki neitt en í rauninni held ég að staðan sú að með hverjum deginum sem líður þá styttist í að gerist eitthvað.“
„Ég sé ekki eftir neinu“
Ásmundur hefur skapað sér nokkrar óvinsældir vegna skoðana sinna og fengið skammar jafnvel frá félögum sínum í Sjálfstæðisflokknum. Eyjan greindi frá því 2016 að hann vildi að það yrði rætt alvarlega að loka landamærum Íslands fyrir flóttafólki og hælisleitendum og því fólki yrði snúið við á Keflavíkurflugvelli og það sent til síns heima. Ákvað Ásmundur að ræða þessi mál eftir að hælisleitandi hafði í örvæntingu hótað að kveikja í sér. Sagði Ásmundur að íslenskt samfélag væri ekki vant slíkum hótunum. Vakti málflutningur Ásmundar umtal en Áslaug Friðriksdóttir, Unnur Brá Konráðsdóttir og Áslaug Arna, allt þingmenn Sjálfstæðisflokksins fundu að málflutningi Ásmundar.
Ásmundur ræddi þá málin við Eyjuna og skammaði þingmennina.
„Umræðan er svo yfirgengileg að það er ekki hægt að svara þegar fjölskyldu manns er óskað til andskotans. Það er kostulegt að í hvert sinn sem rætt er um flóttafólk eða hælisleitendur fer allt á annan endann. Ég er sakaður um að vera ómenni. Konan mín hefur bannað börnum og barnabörnum að fara á samskiptamiðlana enda umræðan með ólíkindum og ótrúlegt hvað fólk lætur út úr sér.“
Þá spurði blaðamaður Eyjunnar hvort Ásmundur sæi eftir því sem hann sagði á þingi. Ásmundur svaraði:
„Ég sé ekki eftir neinu. Þegar talað er blaðlaust getur maður sagt flóttamaður þegar maður ætlaði kannski að segja hælisleitandi. En öllu er slegið á versta veg.“
Útvarp saga í gær
Í viðtalinu á Útvarpi Sögu barst einnig talið að kostnaði við móttöku á hælisleitendum og sagði þingmaðurinn kostnað hafa farið langt fram úr áætlunum.
„öllum áætlunum á undanförnum 2-3 árum, þegar menn ætluðu 450 milljónum í málaflokkinn þá fór það yfir milljarð, og núna erum við að tala um að menn sáu það strax í febrúar að þegar var talað um 500 hælisleitendur á þessu ári þá voru komnir 700 en núna eru menn farnir að tala um að þetta verði á annað þúsund og kannski meira og kostnaðurinn hef ég heyrt 3,6 milljarða eða ein Dýrafjarðargöng á ári.“
