Ungir Píratar ásamt fleirum boða til mótmæla á Austurvelli sunnudaginn 28. maí kl. 15. Tilefni mótmælanna er möguleg sameining Fjölbrautaskólans við Ármúla og Tækniskólans, sem skipuleggjendur segja ólýðræðislega. Á fimmta tug hefur þegar meldað sig á mótmælin á Fésbók og hafa á annað hundrað lýst yfir áhuga á að mæta, þar á meðal þingmenn Pírata og Vinstri grænna.

„Við mótmælum ólýðræðislegum vinnubrögðum við sameiningu FÁ og Tækniskólans. Burt með gömlu pólitíkina!,“

segir á síðu mótmælanna á Fésbók. Björn Leví Gunnarsson þingmaður Pírata og Andrés Ingi Jónsson þingmaður VG verða með erindi, sem og Ísabella Ýr Hallgrímsdóttir fulltrúi nemenda við FÁ. Nemendafélag FÁ, Samband íslenskra framhaldsskólanema, Jæja-hópurinn, Ungir Píratar, Ungir Jafnaðarmenn og Ung vinstri græn styðja mótmælin. Vilja þau segja gömlu póitíkinni stríð á hendur:

Ef almenningur krefst þess ekki að vinnubrögðin breytist mun allt halda áfram sem hingað til. Segjum gömlu pólitíkinni stríð á hendur. Burt með bullið. Burt með sérhagsmunabraskið.