Eftir eldri borgara á Akureyri:

Eiga eldri borgarar sem vilja komast í húsnæði fyrir svipaðan aldurshóp engan möguleika nema þeir eigi sand af seðlum? Ekki höfum við lánshæfi svo það gefur auga leið að við þurfum að eiga eign á móti, og það bara nokkuð verðmæta. Við, sem hvorki eigum digra sjóði né verðmætar eignir, eigum því enga möguleika á að komast yfir slíka íbúð, að minnsta kosti ekki hér á Akureyri.

Okurverð

Eins og staðan er í dag er það eingöngu eignafólk sem getur keypt sér slíkar íbúðir. Mér er spurn; hvers vegna er þetta svona? Hvers vegna eru þessar íbúðir á yfirverði, eða réttara sagt á okurverði? Ef slík íbúð kemur á sölu er óskað eftir tilboði og sá sem býður hæst hreppir hnossið og eru slík tilboð himinhá. Minnir þetta ekki á kreppuna miklu 2008?

Slegist um hituna

Við hjónin erum búin að leita eftir íbúð í fjölbýli fyrir 55–60+ þar sem við erum löngu komin á aldur. Við erum samt alls ekki á leið á dvalarheimili í nánustu framtíð. Fyrir okkar eðlilega fjárhag virðist næsta vonlaust að fá inni í slíkri íbúð. Bæði er slegist um hituna ef eitthvað losnar og svo er það verðið; það er bara ekki fyrir venjulegt fólk heldur langt umfram það sem telst eðlilegt. Maður getur í raun talist mjög vel staddur ef maður er eigandi að íbúð í slíku húsi. Á þessum aldri vill maður vera innan um fólk á svipuðum aldri og með svipaða sýn á lífið. Blönduð búseta hentar ekki öllum.

Setja sig á bæinn

Við heyrum endalaust um unga fólkið okkar og íbúðarmál þess en ekki heyrist minnst á þetta mál sem er í raun stórmál sem á enn eftir að versna. Kannski er eina ráðið að segja sig á bæinn, eins og það var kallað í gamla daga. Ég hef rætt við nokkra eldri borgara á svipuðu reki sem vilja, eins og við, vera sjálfstæðir fram í rauðan dauðann. Þeir telja þessa þróun ömurlega og ekki okkur eldra fólkinu bjóðandi.

Lyfta og bílakjallari

Auglýsing í dag gæti hljóðað svona:

Íbúð til sölu í húsi fyrir 60+ aðeins fyrir hæstbjóðanda.

Ég hef rætt við nokkra byggingarverktaka en enginn hefur áhuga á að byggja fjölbýlishús fyrir þennan aldurshóp á sanngjörnu verði. Það er miklu betra að selja eitt stykki blokk til eins aðila eða félagsskapar á einu bretti og svo má líka leigja út á okurverði, eins og mér sýnist að framtíðin ætli að verða.

Með þessum orðum mínum skora ég á lífeyrissjóðina að leggja fé í hús af þessu tagi og góðan byggingaraðila að byggja eitt stykki eldri borgara blokk með eðlilegum meðalíbúðum án íburðar, en með lyftu og jafnvel bílakjallara, á viðráðanlegu verði svo við – þessi sem erum í íbúðarleit í dag þurfum ekki að segja okkur á bæinn.

Birtist fyrst í Akureyri Vikublaði, smelltu hér til að lesa blaðið.