Það má segja að nánast hafi soðið upp úr í sjónvarpssal þegar Sindri Sindrason og Tara Margrét Vilhjálmsdóttur ræddu um fitufordóma í samfélaginu. Viðtalið fór vel af stað en endaði á einkennilegum nótum. Tilefnið að Sara settist í sjónvarpssal var að fyrir helgi stóðu Samtökin ´78, Trans Ísland og feminíska fötlunarhreyfingin Tabú fyrir ráðstefnu og grasrótarhátíð um undir yfirskriftinni Truflandi tilvist. Freyja Haraldsdóttir fyrrverandi þingmaður Bjartrar framtíðar tók einnig þátt í hátíðinni.
Einn af skipuleggjendum hátíðarinnar sagði að tími væri kominn á að aktivistar í jaðarhópum tækju höndum saman.
Það hefur ekki verið gert mikið af því á Íslandi að feitt fólk sé að tala við transfólk sem er að tala við BDSM fólk sem er að tala við fatlað fólk sem er að tala við hinsegin fólk. Það er einhver fiðringur í loftinu – fólk er spennt fyrir þessu,
sagði Auður Magndís Auðurdóttir
Tara, sem er félagsráðgjafi og formaður Samtaka um líkamsvirðingu, sagði á Facebook síðu sinni:
„Það var einfaldlega byltingarkennt að vinna með öllum þessum ólíku hópum, sem eiga það þó sameiginlegt að trufla tilvist normatívs samfélags. Ég lærði svo mikið um eigin forréttindi og veika stöðu mína í samfélaginu, ég lærði auðmýkt, ég valdefldist og ég fylltist eldmóði.“
Tara, sem hefur talað mikið gegn fitufordómum að undanförnu, mætti svo í sjónvarpssal til að ræða um hátíðina við Sindra Sindrason á Stöð 2.
„Þú ert í skýjunum eftir þessa hátíð. En margir sem eru að horfa hugsa, hvað eiga þessir hópar sameiginlegt? Af hverju að halda þetta saman?“ spurði Sindri.
„Þetta eru hópar sem eru ólíkir innbyrðis,“ svaraði Tara og hélt áfram.
Ég veit ekki hvernig er að vera trans eða annað, ég veit hvernig er að vera feit. Það sem við eigum sameiginlegt er að við höfum truflandi áhrif á samfélagið. Og viðbrögð samfélagsins eru mjög keimlík. Ef þú skoðar kommentakerfi þar sem sett er út á trans-einstaklinga, þú getur skipt út orðinu trans fyrir feitur þá ertu kominn með þetta.
Sindri spurði þá hvort staðan nú væri ekki orðin þannig að annað hvert barn væri með greiningu og því gætu nánast allir sett sig í jaðarhóp. Tara svaraði að líklega væri allir á einhverju rófi en það væri sjáanlegt hjá þeim sem ættu við offitu að stríða.
„Svo velti ég öðru fyrir mér, er ekki fordómar oftast „with in“ koma innan frá svo ég noti nú góða íslensku. Er fordómar ekki meira inni í okkur sjálfum?“ spurði Sindri.
„Þetta er í raun talað út úr munni einhvers sem er í forréttindastöðu,“ svaraði Tara. „Þú þarft í raun að hafa upplifað það að vera í jaðarhópi og upplifa fordómana í raun og veru til að kannski skilja þetta.“
Sindri greip þá fram í og sagði: „Ertu að meina að ég sé í …“
„Já.“
„Veistu hvað ég er í mörgum minnihlutahópum?“ spurði Sindri og bætti við:
Ég er hommi, ég á litað barn, það er ættleitt, ég er fyrsti samkynhneigði maðurinn til að ættleiða á Íslandi, ég er giftur útlendingi – eða hálfum útlendingi – þannig að við skulum ekki fara þangað.
Tara svaraði á móti:
„Nei, sko, það er miklu meira samfélagslegt samþykki fyrir fordómum gegn feitu fólki. Það er misjafnt hvað mannréttinda baráttan hefur náð langt“.
Viðtalið sjálft hefur vakið mikla athygli og skiptast skoðanir um það. Viðtalið í heild sinni má sjá hér fyrir neðan en spjall Töru og Sindra byrjar á mínútu 05:35
[klippa id=“ http://www.visir.is/section/MEDIA99&fileid=SRC6F964017-ECB3-4EE8-8F9E-59D985B0E73E“]
