Óli Björn Kárason nýkjörinn alþingismaður Sjálfstæðisflokksis og formaður efnahags- og viðskiptanefndar Alþingis vill beita fullri hörku gegn hælisleitendum sem koma til Íslands og „misnota velferðarkerfið okkar.“

Þetta kom fram í klukkutíma viðtali sem Pétur Gunnlaugsson þáttastjórnandi á Útvarpi Sögu átti við Óla Björn í síðdegisútvarpi stöðvarinnar sl. fimmtudag 26. janúar.

Óli Björn Kárason sagði:

Þegar kemur að útlendingamálum þá held ég að við höfum villst töluvert mikið af leið. Ég vil orða þetta þannig: Við eigum að opna faðminn mjúkan, gagnvart því fólki sem þarf tímabundið eða jafnvel til langframa að leita sér raunverulegs skjóls.

Þingmaðurinn bætti síðan við:

En við eigum að mæta öllum þeim með hörðum stálhnefa sem ætla að koma hingað til Íslands sem, í rauninni ja eigum við að segja, misnota velferðarkerfið okkar. Og það er alveg rétt, og ég held ég muni það rétt, að þegar við vorum að ræða þetta einhvern tímann að þá hafir þú [Pétur Gunnlaugsson] orðað það þannig að það sé í lagi að opna landamærin og hafa þau bara galopin, ef þú leggur niður velferðakerfið.

Pétur Gunnlaugsson greip þá inn og sagði:

Ja, það segja frjálshyggjumennirnir. Það er spurning, ef við opnum landamærin algerlega, þá mun smám saman velferðakerfið leggjast af. Það er alveg ljóst. Algerlega ljóst. Þeir Íslendingar sem halda því gangandi margir, þeir munu bara neita að styðja þetta lengur. Það er alveg ljóst.

Óli Björn svaraði þessu svo:

Það segir sig sjálft að það mun auðvitað molna ef að þunginn verður alltaf meiri og meiri og meiri. Þá verða möguleikar okkar til að standa hér undir heilbrigðiskerfi, undir almannatryggingum og svo framvegis, æ minni. Um það það verður ekkert deilt. Þess vegna er það þannig að í svona þjóðfélagi eins og okkar, að við viljum auðvitað rétta fólki hjálparhönd. Það er ljóst. En við ætlum ekki að gera það með þeim hætti að það grafi undan öllum þeim stoðum sem hér eru. Og þess vegna er það skynsamlegt að afgreiða hér þetta flóttafólk, sem er ekki allt raunverulegir flóttamenn, gera það með snaggarlegum hætti. Með svipuðum hætti til dæmis og Norðmenn gera. Og ég hef sagt: Það er kannski best að við tökum upp stefnu sænskra sósíaldemókrata sem að eru orðnir mjög harðir í útlendingamálum.

Heyra má á útvarpsþáttinn í heild sinni í þáttasafninu á heimasíðu Útvarps Sögu. Ofangreind umræða hefst á 40. mínútu í þættinum.