Í hillingum sáu menn framtíð þar sem internetinu fylgdi gríðarleg lýðæðisvæðing, efling upplýstrar umræðu, aðgengi að upplýsingum, opna stjórnsýslu, jafnvel stöðugar atkvæðagreiðslur um mikilvæg mál á netinu.

En þetta er að þóast í nokkuð aðra átt. Internetið fleytir áfram alls kyns upplýsingum, flaumurinn er óskaplegur, og það þarf dómgreind til að vinsa úr. Fordómar og rugl fá jafnvel meira vægi en staðreyndir og skynsamlegar greiningar.

Það verður að segjast eins og er að mannkynið er ekki að höndla þetta sérstaklega vel. Með aukinni notkun samskiptamiðla minnkar einbeitingin, það er erfiðara að standa álengdar, fólk berst með flóðinu – það er nánast eins og heilabúið okkar sé ekki hannað fyrir þetta. Það er líka auðvelt að lokast inni í hólfum á netinu þar sem ákveðnar skoðanir eru yfirnæfandi en aðrar sjást ekki. Má jafnvel segja að mitt í öllu upplýsingaflæðinu séum við komin inn á einhvers konar and-upplýsingaröld, svo vísað sé í heimspekistefnu sem upphófst á 17. öld.

Þá gáfu menn út alfræðibækur til að fræða mannkynið og fleyta því áfram til upplýsingar, þekkingar, skynsemi og betra lífs.

Þetta er stórt íhugunarefni og það er athyglisvert að heyra skoðun Helga Hrafns Gunnarssonar, fyrrverandi þingmanns. Píratar voru framan af ótrauðir við að boða fagnaðarerindi netvæðingar – en nú eru meira að segja runnar á þá tvær grímur.

Helgi Hrafn var gestur í Lestinni á Rás 1 í síðustu viku að ræða þessa tíma sem æ oftar farið að kalla „post fact“ eða „samfélag handan staðreynda“, eins og það var orðað í þættinum.

Internetið er að breyta öllu sem við gerum í persónulega lífinu, faglega, og pólitíska. Áhrifin eru ekki alfarið góð og staðreyndir eru bæði fjarlægari og nær okkur. Það er mikið meira af upplýsingum og auðveldara að hafa upp á þeim. En mannfólkið þarf að þróast með tækninni og læra að vinna úr þeim.

Það er spurning hvernig hægt er að sporna við. En meðal lykilatriða er að vara við hættunni af því að samskiptamiðlar taki algjörlega yfir miðlun upplýsinga og svo einfaldlega að fara að kenna fólki, sérstaklega börnum og ungmennum, að umgangast internetið og varast pyttina sem þar leynast.