Á næstu árum ætlar að hellast yfir okkur steinsteypa í Miðbæ Reykjavíkur. Hótel við Hörpu, nýjar höfuðstöðvar Landsbankans, stórbyggingar á vegum fasteignafélagsins Regins í Austurhöfn með íbúðum og verslunum og svo nýtt hótel á horni Lækjargötu og Vonarstrætis.
Allt mun þetta hafa afgerandi áhrif á hvernig svæðið frá Lækjargötu út að höfninni lítur út. Þetta verða líklega stærstu breytingar á Miðbænum sem um getur. Því miður virðist vera að margt af þessum byggingum séu algjörlega úr samræmi við gömlu byggðina sem þarna er. Hún er reyndar ekki alls staðar vel farinn, sums staðar er hún eins og skorðóttur tanngarður, svæðið kringum Tryggvagötuna er mjög dapur og sömuleiðis Lækjartorg.
En það er samt spurning hvort við viljum fara með byggðina í þessa átt. Framkvæmdirnar bera vott um óðagot, að nú sé aftur komin fasteignabóla og tími til að byggja eins og enginn sé morgundagurinn. En hefur einhver horft á þessar tillögur í heild – hefur verið rýnt í þær með tilliti til fagurfræði og samræmis. Það verður að segjast eins og er að engin viðleitni hefur verið til að skýra allar þessar framkvæmdir út fyrir borgarbúum og umræðan um þær er lítil sem engin.
Nú er búið að finna merkar fornminjar í Lækjargötunni. Það hlýtur að tefja eða jafnvel stöðva byggingu hótelsins þar. Það er fagnaðarefni.
Hluti af fyrirhuguðum byggingum Regins í Miðbænum.
