Lítil þátttaka svokallaðrar þúsaldarkynslóðar í kosningum í Bandaríkjunum vekur athygli. Einungis 12 prósent Bandaríkjamanna undir þrítugu kusu í þingkosningunum í nóvember.

Þetta er ekki bara vegna þess að áhuginn á stjórnmálaum sé lítill sem enginn – það er auðvitað meginskýringin – heldur er hitt líka staðreynd að þetta unga finnur enga samkennd með hefðbundnum stjórnmálaflokkum. Helmingurinn segist ekki fylgja neinum flokki að málum, það eru tölur sem ekki hafa sést áður í Bandaríkjunum.

Um þetta er fjallað í tímaritinu The Week. Þar glittir í framtíðarsýns sem vekur ugg – forsetakosningar árið 2016 sem væru milli Hillary Clinton og Jeb Bush.

Blaðið telur að þetta gæti endanlega orðið til þess að drepa áhuga ungs fólks á stjórnmálum. Tveir úr Bush-fjölskyludnni hafa verið forsetar, samanlagt í tólf og Bill Clinton var forseti í átta ár.

Eins og blaðið segir, þetta eru forsetarnir sem hafa átt í endalausum tilgangslausum stríðum, stóraukið skuldir ríkisins, magnað upp eftirlitssamfélagið, haldið úti vonlausu stríði gegn fíkniefnum, verið sérstaklega hollir stórfyrirtækjum og fjármálavaldinu. Ekkert bendir til þess að aðrir meðlimir úr sömu fjölskyldum muni breyta þessari stefnu.

Það er altént öruggt að Jeb og Hillary munu ekki draga ungt fólk á kjörstað.