Eftir mikil undanbrögð þar sem hver vísaði á annan, voru hríðskotabyssurnar frá Noregi sendar heim. Það kom á daginn þær voru ekki gjöf – og þá vildi Landhelgisgæslan nota peningana í annað.
En yfirlögregluþjónninn Jón Bjartmarz er ekki af baki dottinn. Nú vill hann fá vélbyssur eftir öðrum leiðum – og ber við ógninni sem starfar af íslömsku hryðjuverkasamtökunum ISIS.
Nú eru þetta að sönnu ógeðsleg samtök, en ekkert hefur þó komið á daginn sem bendir til þess að þau starfi hér. Vissulega er rétt að fylgjast með því.
Frétt af þessu í DV vekur athygli, en þó ekki síst myndskreytingin, þetta er samsett mynd. Þarna er hinn byssuglaði Jón Bjartmarz með vélbyssu. Fyrir aftan hann er ISIS-liði í Ninja-búningi veifandi svörtum fána. Í bakgrunni er svo sjoppa á Vesturgötunni.
Hún hefur verið í eigu erlendra aðila, en ekki er vitað til að hún sé gróðrarstía fyrir íslamska fasismann.
Lögreglan þarf sjálfsagt einhver vopn, þótt ljóst sé að okkur stafar miklu meiri hætta af náttúrunni á tíma þegar geisar eldgos. Það er komið í ljós að örstutt er þar ofan í möttul jarðar, manni líður allt í einu eins og maður gangi ofan á þunnu skæni með glóandi eld undir.
Ég verð að viðurkenna að ég er ekki sannfærður um að við Íslendingar séum nógu vel búnir undir hamfaragos.
Eins og áður hefur verið margsinnis bent á hefur ofbeldisglæpum fækkað á Vesturlöndum. Enn höfum við í vestrinu heldur ekki upplifað hryðjuverk af völdum ISIS.
Hin samsetta mynd úr DV sem getið er í greininni.
