Það verður seint sagt að nýs frumvarps um stjórn fiskveiða sé beðið með óþreyju, frekar að maður skynji kvíða gagnvart því.

Líklegt er að frumvarpið verði uppspretta mikilla deilna.

Ríkisstjórn Jóhönnu Sigurðardóttur einsetti sér að breyta fiskveiðistjórnuninni, en mistókst það hrapallega. Samfylkingin og Vinstri græn voru ekki sammála og stjórnin hafði einfaldlega ekki pólitískan styrk til þessa.

Nú eru komir til valda eindregnustu kvótasinnar landsins og það er stefnt í allt aðra átt. Kvótahöfum skulu tryggð yfirráð yfir auðlindinni til langs tíma – og veiðigjöld skulu lækkuð. Þetta eru meginlínurnar.

Hætt er við að samfélagið muni loga þegar þetta verður kynnt nú innan tíðar. Ekki hjálpar þá að við lifum tíma þegar stór útgerðarfélög skila ótrúlegum hagnaði til eigenda sinna.