Í þáttunum Vesturfarar var meðal annars sagt frá Fálkunum í Winnipeg sem urðu ólympíumeistarar í íshokkí árið 1920, kepptu fyrir Kanada, en liðið var að mestu skipað ungum Vestur-Íslendingum.

Þetta skemmtilega myndband var birt í Kanada fyrir fáum dögum í tilefni af minningardeginum um fyrri heimstyrjöldina. Tveir liðsmenn Fálkanna féllu í styrjöldinni – það var áður en þeir kepptu á Ólympíuleikunum. Þeir sem féllu voru Frank „Buster“ Thorsteinsson og George Cumbers.

Þrír Fálkanna voru flugmenn í stríðinu, Konnie Johannesson, Hebbie Axford og Frank Fredrickson. Sá síðastnefndi var annar maðurinn til að fljúga flugvél á Íslandi.

Myndbandið er gert á vegum Historica Canada og hefur yfirskriftina Heritage Minute. Í myndbandinu er sagt að þeir fari í leikinn fyrir „strákana á Sargent Avenue“, en þar var einmitt hjarta íslenska hverfisins í Winnipeg.