Níundi þáttur Vesturfara er á dagskrá sjónvarpsins í kvöld klukkan 20.10

Í þessum þætti förum við til Albertafylkis, vestur undir Klettafjöllum, á slóðir skáldsins Stephans G. Stephanssonar.

Stephan nam þvívegis land í Ameríku, síðast í Markerville í Alberta. Hús hans þar er safn, ekki bara um hann, heldur líka um lífshætti landnema í vestrinu.

Í þættinum kynnumst við tveimur eftirlifandi barnabörnum Stephans G., Iris Bourne sem hefur fengist við búskap allt sitt líf og Stephan Benediktson, sem hefur starfað við olíuboranir víða um heim. Móðir þeirra var Rósa, yngsta barn skáldsins.

Rósa var fædd 1900 og dó 1995. Maður hennar var Sigurður Benediktsson, en hann dó fyrir aldur fram 1942, en eftir það þurfti Rósa að sjá fyrir börnum sínum. Stephan fór að vinna í olíuiðnaði en Iris hélt tryggð við sveitina og hefur stundað búskap allt sitt líf.

Iris og Stephan í gamla skólanum í Markerville. Þetta var hús með einni skólastofu og þar bjó kennslukonan.