Þingskjal númer 17 á yfirstandandi þingi fjallar um að heimila skuli sölu áfengis í matvörubúðum. Þetta er mál sem fékk talsvert umtal áður en það var lagt fram. Aðalflutningsmaðurinn er hinn ungi þingmaður Vilhjálmur Árnason úr Sjálfstæðisflokki, en meðflutningsmenn eru úr fjórum flokkum, Sjálfstæðisflokki, Bjartri framtíð, Framsóknarflokki og Pírötum. Þeir eru:

Björt Ólafsdóttir, Jón Þór Ólafsson, Willum Þór Þórsson, Unnur Brá Konráðsdóttir, Guðlaugur Þór Þórðarson, Ragnheiður Ríkharðsdóttir, Birgir Ármannsson, Pétur H. Blöndal, Jón Gunnarsson,
Brynhildur S. Björnsdóttir, Karl Garðarsson, Haraldur Einarsson.

Margt bendir til þess að frumvarpið verði samþykkt ef það kemur til kasta þingsins. Líklega yrðu Vinstri græn eini flokkurinn sem væri alfarið á móti. Sjálfstæðisflokkurinn yrði sennilega allur með, sem og Píratar, hluti af Framsókn og Bjartri framtíð og einhverjir úr Samfylkingu.

En svo er spurning hvort ríkisstjórni kæri sig um að efna til svo róttækrar og umdeildrar breytingar í vímuefnamálum? Ríkiseinkasala á Víni er í Noregi, Svíþjóð og Finnlandi. Þessar þjóðir hafa lagt mikla áherslu á að halda þessu fyrirkomulagi í viðskiptum sínum við Evrópusambandið.

Ein leiðin til að þetta verði ekki er einfaldlega sú að hleypa málinu ekki á dagskrá þingsins eða tefja það í nefndum. Það væri svosem ekkert einsdæmi, því þingmannamál daga einatt uppi.