Ég fór að rifja upp hvaða stóru tónleika ég hef farið á um dagana. Ég hef alltaf haft mikið yndi af því að fara á tónleika, og það er eiginlega sama í hvaða grein tónlistar það er.

Einhverjir bestu tónleikar sem ég hef farið á hafa verið í Hörpu, tónleikar Berlínarfílharmóníunnar með Simon Rattle og Gautaborgarsinfóníunnar undir stjórn Dudamels. Ég hef reyndar náð að vera á fernum tónleikum með Berlínarfílharmóníunni, þrisvar undir stjórn Rattles og einu sinni undir stjórn Abbados.

Þetta kom til vegna þess ég rifjaði upp í ákveðnu samhengi á Facebook að ég hefði séð David Bowie í Marseille 1978. Með hjálp netsins er hægt að finna furðulegustu hluti, nú get ég séð að tónleikarnir voru 27. maí þetta ár og hvaða lög hann spilaði.

Það voru meðal annars Heroes, Fame, Station to Station, TVC15 og Rebel Rebel.

Ég sá Led Zeppelin í Laugardalshöll 1970. Þá var ég ekki nema tíu ára, en fjarska mikill áhugamaður um tónlist. Ég og vinur minn, Siggi Pálmi, fengum að fara með Jóni Ásbergssyni, stóra bróður hans, núverandi forstjóra Íslandsstofu. Ég kann honum ævarandi þökk fyrir.

Sama ár sá ég Kinks spila í Höllinni. Þeir voru nýbúnir að gera Lola að vinsælu lagi, en tónleikarnir þóttu ekki vel heppnaðir.

Ég sá Dylan í París 1978, sá túr kom seinna út á Budokan-plötunni, Neil Young í Barcelona 1987, Frank Zappa á Knebworth-hátíðinni 1978, Van Morrison hef ég séð fjórum sinnum en Paul McCartney tvisvar. Rolling Stones sá ég á Twickenham-leikvanginum fyrir utan London 2006. Þetta er stór og ljótur íþróttavöllur og það var ekki góð stemming á tónleikunum. Almennt held ég að beri að forðast tónleika á slíkum völlum.

´