Ég fylgdist með fyrsta maí göngunni fara niður Bankastrætið. Það var mikið fjölmenni í bænum.

En sýnu fjölmennust var þó græna gangan sem kom í kjölfarið á göngu verkalýðsfélaganna.

Mannfjöldinn í henni var eiginlega ótrúlegur. Ég taldi ekki. En gangan var lengi lengi að komast niður strætið.

Skilaboðin eru óneitanlega sterk – andstaðan við virkjanir og stóriðju er ekkert að linast.

Nýlegar skoðanakannanir sýna líka að meirihluti þjóðarinnar er á móti frekari byggingu álvera – og virkjun í Bjarnarflagi.

Forysta verkalýðshreyfingarinnar hlýtur að þurfa að taka eitthvert mark á þessu. Andstaða hennar við grænu gönguna virðist hafa eflt hana fremur en hitt.