Það virðist vera nokkuð skrítið ástand á Alþingi Íslendinga núna – sem oftar.

Það er hart deilt um vantrauststillögu Þórs Saari sem er tilkomin vegna vanefnda ríkisstjórnarinnar í stjórnarskrármálum.

En það eru fæstir að tala um stjórnarskrána, umræðan fer út um víða völl. Stjórnin er húðskömmuð fyrir ýmsa hluti – og á móti skamma stjórnarliðar Sjálfstæðisflokkinn og Framsókn. Þingmenn nýta sér að ljós fjölmiðlanna beinast að þeim.

Að nokkru leyti virkar þetta eins og upptaktur fyrir kosningar sem eiga að fara fram eftir sjö vikur. Við erum að heyra alla frasana sem munu glymja í kosningabaráttunni.

Sá litli fókus sem þarna er að finna er á kosningunum, ekki vantrautstinu sem slíku eða stjórnarskránni – sem var þó tilefnið.

Á miðvikudagskvöldið verða eldhúsdagsumræður frá Alþingi, þeim verður sjónvarpað beint. Eru þingmenn nokkuð að rugla þessu tvennu saman?