„Við erum með velferðarkerfi sem enginn hefur áhuga á að borga inn í en allir eru að reyna að ná einhverju út úr,“ sagði Gunnar Smári Egilsson í útvarpi í morgun. Hann er tekinn við sem formaður SÁÁ.

Og það er rétt hjá honum, Íslendingum hefur aldrei verið gefið að borga skatta með glöðu geði. Það er nefnilega einn lykillinn af velferðarríkjum í Skandinavíu að almenningur borgar sína skatta og telur það ekki sérstaklega eftir sér.

Ekki skánaði ástandið á Íslandi við hina miklu frjálshyggjuvæðingu samfélagsins síðustu tvo áratugi. Þá var talað um ríkið eins og það væri af hinu illa – og það gæti ekki verið öðruvísi. Hugmyndin var að ríkið væri óvinur sem helst ætti að kveða í kútinn.

Það er heldur fáfengilegt viðhorf í samfélagi þar sem við leggjum svo mikið til ríkisins og tökum svo mikið frá því til baka. Páll Skúlason heimspekingur gerðist meira að segja svo djarfur að halda því fram fyrir stuttu að við ættum að láta okkur þykja vænt um ríkið.