Ólafur Ragnar Grímsson forseti sagði í viðtali við mig um daginn að einn helsti gallinn á stjórnskipan Íslands væri hvernig farið væri að því að skipa dómara í Hæstarétt.

Kerfið er einfaldlega þannig að dómarar hafa verið handvaldir af ráðherrum. Ráðherrarnir hafa yfirleitt verið úr Sjálfstæðisflokknum.

Nú stendur til að skipa þrjá hæstaréttardómara í viðbót – vegna anna í réttinum. Skipanin verður tímabundin, en gera má ráð fyrir því að þeir sem verða metnir hæfir til að sitja í Hæstarétti í þetta sinn eigi betri möguleika en aðrir að komast þar að.

Nú er það ráðherra úr Vinstri hreyfingunni, grænu framboði sem skipar dómarana. Sjálfur Ögmundur Jónasson. Stjórnmálaskoðanir Ögmundar liggja einhvers staðar á mörkum sósíalisma og anarkisma.

Það verður gaman að sjá hvernig honum tekst til við að skipa nýja dómara og hvaða viðhorf verða ofan á. Það eru náttúrlega áberandi fáar konur í réttinum. Svo er spurning eftir hverju er leitað. Þegar þurfti að skipa frænda Davíðs Oddssonar í réttinn voru notuð þau rök að það þyrfti mann með sérþekkingu í Evrópurétti. Ólafur Börkur Þorvaldsson hafði sótt námskeið í því í Svíþjóð.

Þannig er náttúrlega hægt að teygja og toga mælistikurnar.