Hvernig á að bregðast við svonalöguðu? Kannski alls ekki, en ég ætla samt að leggja orð í belg.  Ungur maður hefur sest yfir þættina mína – eða ég veit ekki hvernig hann hefur unnið þetta – og tekið saman einhvers konar lista yfir gesti sem hafa komið í Silfur Egils frá hruni. Einhverjir vinir hans stökkva fagnandi á þetta – þeir sömu og í dag birtu grein þar sem fjármálaráðherra var kallaður Steingrímur Júdas Sigfússon.

Listinn er reyndar athyglisverður – því mér sýnist að stjórnarandstöðuþingmenn eigi greiðari leið í þáttinn en stjórnarþingmenn og að að órólegir stjórnarliðar  eins og Lilja Mósesdóttir og Benedikt Sigurðarson séu líka tíðari gestir en þægu stjórnarþingmennirnir. Á toppnum er enginn þingmaður eða ráðherra úr stjórnarliðinu.

Það hallar semsagt fremur á ríkisstjórnina en stjórnarandstöðuna. Það er kannski eitthvað sem ég þarf að íhuga.

Svo er farið að flokka fólk í vinstri og hægri og þá er komist að þeirri niðurstöðu að 75 prósent séu vinstri menn. Þetta er gert samkvæmt einhvers konar huglægu mat á því hvað er vinstri og hvað er hægri. Hvernig sú lína er dregin veit ég ekki – það er ekki alveg augljóst á tíma þegar við tilheyrum svo mörg hinni víðfemu og illa skilgreindu miðju, og erum kannski í aðra röndina það sem hefur verið kallað pólitísk viðrini?

Eða hvernig er það – er hægt að segja að Sigrún Davíðsdóttir sé sérstök vinstri kona? Eða Andri Geir Arinbjarnarson? Eða þá Vilhjálmur Bjarnason? Eða Þorvaldur Gylfason? Gunnar Smári Egilsson? Marinó G. Njálsson?  Jón Daníelsson? Jóhannes Björn? Eiríkur Bergmann? Hvar ætli mörkin liggi? Ber fólk einhvers konar stimpil, er einhvers staðar hægt að fletta upp hvernig það er skilgreint – eða er þetta bara gamall og grautfúll dilkadráttur?

1. Sigrún Davíðsdóttir    (9)
2. Lilja Mósesdóttir    (7)
3. Ólafur Arnarson    (7)
4. Gunnar Smári Egilsson    (6)
5. Andri Geir Arinbjarnarson    (6)
6. Benedikt Sigurðarson    (6)
7. Bjarni Benediktsson    (6)
8. Þór Saari    (5)
9. Þorvaldur Gylfason    (5)
10. Eiríkur Bergmann Einarsson    (5)
11. Eva Joly    (5)
12. Jón Baldvin Hannibalsson    (5)
13. Marinó G. Njálsson (5)
14. Jóhann Hauksson    (5)
15. Sigurbjörg Sigurgeirsdóttir    (5)
16. Jóhannes Björn Lúðvíksson    (5)
17. Agnes Bragadóttir    (5)
18. Jón Daníelsson    (5)
19. Sigmundur Davíð Gunnlaugsson    (5)
20. Vilhjálmur Bjarnason    (5)